Затрымалі кіраўніка цэнтра тэхнічнай падтрымкі БелАЗ у Расіі. На ім разарвалі кашулю, каб паказаць тату з арнаментам
Мужчыну вінавацяць ва ўдзеле ў пратэстах і каментарах. Цяпер ён за кратамі.
14.08.2023 / 13:23
Андрэй Фёдараў. Фота: ягоная старонка «Укантакце»
Андрэю Фёдараву 44 гады. Ён з Мінска, скончыў 36-ю школу ў мінскай Чыжоўцы, а пасля паступіў у Беларускі дзяржаўны ўніверсітэт інфарматыкі і радыёэлектронікі. Мужчына доўгі час працаваў у цэнтрах тэхнічнай падтрымкі БелАЗаў у Расіі. З 2015-га ўзначальвае такі цэнтр у Белгародскай вобласці, у розныя часы таксама кіраваў цэнтрамі ў Мурманскай і Растоўскай абласцях.
Яго вінавацяць ва ўдзеле ў пратэстах у 2020 годзе і пакіданні каментароў у інтэрнэце. Адметна, што ён выдаліў свой тэлеграм-акаўнт напрыканцы 2022-га, але яго адшукалі, імаверна, праз каментары — ён даваў там шмат інфармацыі пра сябе і пакінуў іх шмат (не менш за тысячу).
Падчас затрымання губазікаўцы разарвалі або разрэзалі ягоную кашулю — гэта добра відаць на фота з іх канала. На руцэ мужчыны вялікая тату з нацыянальным арнаментам.
Андрэй Фёдараў у разрэзанай кашулі. Фота з тэлеграм-каналу ГУБАЗіК
На Андрэя Фёдарава, як паведамляе канал сілавікоў, завялі крымінальную справу.
Чытайце таксама:
За каментары затрымалі айцішніка, які выдаліў тэлеграм-акаўнт паўтара года таму. Вось як яго знайшлі
Распазнаванне твараў: што гэта такое, як яно працуе і якія здольнасці беларускіх сілавікоў
Тлумачым, якім чынам сілавікі знаходзяць карыстальнікаў Telegram і як гэтага пазбегнуць