U Biełarusi moža źjavicca anałah rasijskaha vajenna-patryjatyčnaha centra «Avanhard»
Biełaruski anałah moža adkrycca pad inšaj nazvaj, ale sutnaści heta nie pamianiaje.
19.08.2023 / 07:49
U Rasii centr «Avanhard» adkryvali ministr abarony Siarhiej Šajhu, hubiernatar Maskoŭskaj vobłaści Andrej Varabjoŭ i mer Maskvy Siarhiej Sabianin
Anałah rasijskaha vučebna-mietadyčnaha centra vajenna-patryjatyčnaha vychavańnia «Avanhard» płanujecca adkryć u Biełarusi. Pra heta ŭ intervju TASS raspaviała dyrektar arhanizacyi Darja Barysava na palach forumu «Armija-2023».
«Našy kalehi ź Biełarusi chočuć adkryć u siabie anałah «Avanharda». Stend «Avanharda» naviedvaŭ ministr abarony Biełarusi Viktar Chrenin. Jon užo byŭ u našym centry niekalki hadoŭ tamu, ahladaŭ terytoryju. My damovilisia ab tym, što ŭ najbližejšy čas prapracujem mahčymaść padpisańnia mižnarodnaha Miemaranduma ab supracoŭnictvie ŭ hetaj halinie pamiž našymi krainami i paŭdzielničajem u stvareńni «Avanharda» na terytoryi Biełarusi», — skazała Barysava.
Pavodle jaje, biełaruski anałah moža adkrycca pad inšaj nazvaj. «Ale sutnaści heta nie pamianiaje», — padkreśliła Barysava.
Centr «Avanhard» u Rasii byŭ pabudavany ŭ 2019-2020 hadach za 372 dni.
Centr raźličany na adnačasovaje navučańnie i kruhłasutačnaje pražyvańnie 900 školnikaŭ i 1800 studentaŭ vypusknych kursaŭ kaledžaŭ z Maskvy i Maskoŭskaj vobłaści. Vajennyja zbory dla kožnaj katehoryi navučencaŭ doŭžacca 5 dzion, na praciahu jakich staršakłaśniki i studenty ahulnaadukacyjnych arhanizacyj vyvučajuć 6 vajenna-ulikovych śpiecyjalnaściaŭ pad kiraŭnictvam 110 prafiesijnych instruktaraŭ, piedahohaŭ i važatych. Za hod centr prymaje zvyš 80 tysiač kursantaŭ.
Meta «Avanharda» ŭ Rasii — adukacyja i vychavańnie padrastajučaha pakaleńnia ŭ duchu lubovi da Radzimy i papularyzacyja siarod moładzi vajskovaj i dziaržaŭnaj słužby.