Hrupa nieviadomych źbiła biełarusa ŭ centry Biełastoka
Pryčyna kanfliktu nieviadomaja.
19.08.2023 / 09:32
Biełastok. Ilustracyjnaje fota: Wikimedia Commons
U centry Biełastoka nieviadomyja źbili biełarusa. Situacyja adbyłasia ŭnačy 18 žniŭnia. Videa złačynstva z redakcyjaj Most padzialiŭsia čytač.
Raman staŭ śviedkam taho, jak na vulicy Lipovaj u Biełastoku kala dziesiaci čałaviek źbivali biełarusa. Pryčyna kanfliktu nieviadomaja.
— Było kala treciaj hadziny nočy. Moj siabar pačuŭ niejkija kryki na vulicy i vyjšaŭ na bałkon. Niedaloka ad darohi nieviadomyja źbivali zamiežnika. Ich było kala dziesiaci čałaviek, i jany kryčali na polskaj. Potym ź ich słoŭ stała zrazumieła, što bili biełarusa. Kryčali, kab jon valiŭ z krainy. Potym pryplali Ukrainu i Pucina, — raspaviadaje Raman.
Źbivańnie adbyvałasia kala 10 chvilin. Čytač ździŭlajecca, što za hety pieryjad na adnoj z samych ažyŭlenych vulic Biełastoka nie akazałasia patrula palicyi.
— Niejki kašmar adbyvaŭsia. Paśla taho, jak čałaviek pierastaŭ ruchacca, hrupa ludziej stała adychodzić. I tolki adzin ź ich viarnuŭsia pahladzieć, u prytomnaści jon ci nie. Chłopiec byŭ u prytomnaści i napadnik pajšoŭ. Paśla hetaha biełarus padniaŭsia i sieŭ na łaŭku. Padjechała mašyna taksi, vyjšaŭ kiroŭca i chacieŭ dapamahčy, ale chłopiec admoviŭsia. Praź niejki čas jon sam pajšoŭ, — dadaŭ Raman.
Paźniej śviedka patelefanavaŭ u palicyju, choć i z zatrymkaj. Palicyja pryjazdžała na miesca zdareńnia, ale tak jak paciarpieły pajšoŭ, to narad źjechaŭ.
Što rabić zamiežniku, kali jaho źbili ŭ Polščy
U Centry padtrymki zamiežnikaŭ fondu «Akno na Uschod» u Biełastoku raspaviali Most, što rabić biełarusam, kali ich źbili abo abrazili ŭ Polščy.
— Čałaviek pavinien patelefanavać u palicyju. Kali supracoŭniki admaŭlajucca pryjazdžać, jon moža źviazacca ź luboj pravaabarončaj arhanizacyjaj abo arhanizacyjaj, jakaja zajmajecca zamiežnikami ŭ Polščy. Dalej arhanizacyja budzie źviartacca ŭ palicyju.
Kali palicyja nie pryjechała, to čałaviek na nastupny dzień pavinien padać užo samastojna zajavu ŭ adździaleńnie. Padrabiazna apisać, dzie byŭ incydent, kolki ludziej, ci byli tam kamiery, usie inšyja važnyja momanty. Pažadana, kab byli śviedki. Sa spravaj nielha zaciahvać. Kali jość paboi, to varta prajści ahlad. Važna ŭsio zafiksavać.
Kali ŭ zamiežnika niama srodkaŭ na advakata, to jon moža być pryznačany administracyjaj horada.