Padmaskoŭje znoŭ atakavali bieśpiłotniki: jość paškodžańni
Stalicu Rasiju nočču 22 žniŭnia znoŭ atakavali bieśpiłotniki, u horadzie Krasnahorsk Maskoŭskaj vobłaści paškodžany šmatpaviarchovik i aŭtamabili.
22.08.2023 / 06:42
Nastupstvy prylotu ŭ Krasnahorsku. Fota: Baza
Jak paviedamlaje «Astra», u Krasnahorsku paśla vybuchu ŭ damach pavylatali šyby i paškodžanyja aŭtamabili. Na asfalcie adnaho z dvaroŭ lažali abłomki mierkavana BPŁA.
Kanał «Shot» śćviardžaje, što nad Krasnahorskam dron byŭ źbity ŭ rajonie budynka ŭrada Maskoŭskaj vobłaści.
Vybuch taksama čuli žychary maskoŭskaha rajona Strohina. Paśla vybuchu ŭ niebie bačny dym.
U Krasnahorsku paškodžanyja fasad i vokny 25-paviarchovika i pryparkavanyja pobač z domam aŭtamabili.
Usie staličnyja aeraporty byli zakrytyja na niejki čas.
Hubiernatar Padmaskoŭja Andriej Varabjoŭ napisaŭ:
«Siońnia nočču dva bieśpiłotniki byli pierachoplenyja SPA na terytoryi Padmaskoŭja: u Čascach u Adzincoŭskaj haradskoj akruzie i ŭ Krasnahorsku, u Paŭšynskaj pojmie. Asnoŭnaja ŭvaha ŭsich apieratyŭnych słužbaŭ — druhomu incydentu. Vybuchovaj chvalaj pry padzieńni byli vybityja šyby ŭ šmatpaviarchoviku, paškodžanyja aŭtamabili. Paciarpiełych siarod žycharoŭ niama, uzharańnia taksama niama. Kiraŭnik Krasnahorska ciapier pravodzić abychod kvater razam z MNS i inšymi słužbami. Prašu ŭsich zachoŭvać spakoj», — piša Varabjoŭ.
Taksama Minabarony Rasii paviedamiła, što bieśpiłotniki ŭnačy atakavali Branskuju vobłaść.
«Dva BPŁA vyjaŭlenyja srodkami SPA i padaŭleny kompleksami REB, paciarpieli krušeńnie nad terytoryjaj Branskaj vobłaści», — zajavili ŭ viedamstvie.
Čytajcie taksama:
Ukrainskim dronam paškodžany rasijski samalot na aeradromie ŭ Kałužskaj vobłaści — HUR
Ukrainie ŭdałosia ŭpieršyniu źniščyć rasijski stratehičny jadzierny bambavik
Niedaloka ad Krasnahorska Maskoŭskaj vobłaści ŭpaŭ bieśpiłotnik