Беларускія ліфты ў дамах Рыгі становяцца ўсё большай праблемай
У Рызе абслугоўванне ліфтаў у шматкватэрных дамах становіцца ўсё больш сур'ёзнай праблемай, бо ў дамах, пабудаваных у савецкі час, устаноўлены ліфты беларускай вытворчасці, заявіў агенцтву LЕТА старшыня праўлення Rīgas namu pārvaldnieks (RNP) Марыс Озаліньш, піша Delfi.lv.
22.08.2023 / 09:19
Фота: gefest-lift.ru
«Гэта праблема. Усе ліфты дамоў, пабудаваных за савецкім часам, вырабленыя ў Беларусі на магілёўскім заводзе, у якога пасля ўвядзення санкцый мы нічога не можам купіць», — сказаў Озаліньш.
Цяпер дэталі, неабходныя для рамонту, заказваюцца ў іншым месцы, але гэта даражэй. Таксама ёсць дамы, у якіх больш карысна было б замяніць ліфты на новыя, а не рамантаваць іх. Аднак ліфты іншых вытворцаў маюць іншыя тэхнічныя параметры, а гэта азначае, што, напрыклад, праёмы ліфтаў ва ўсім будынку прыйдзецца перарабляць.
Таксама праз тое, што дэталі ліфтаў з Магілёўскага завода ўсё менш даступныя на рынку, ліфты, магчыма, давядзецца замяняць, нават калі цяперашнія яшчэ можна адрамантаваць.
«Гэта будзе вельмі шырокая ў фінансавым стаўленні праграма. Тут мы нават папрасілі б падтрымкі ў Рыжскай думы, таму што такая сітуацыя паўстане адначасова ў многіх дамах», — сказаў Озаліньш.
У шматкватэрных дамах Рыгі ўстаноўлена больш за 1000 ліфтаў, а кошт замены аднаго з іх, па даных домакіраўніцтва, складае каля 50 000 еўра.