Viarchoŭny sud razhledzić pazoŭ ab likvidacyi jašče adnoj praŭładnaj partyi. Užo likvidavali bolš za pałovu partyj
Hetym razam budzie razhledžany pazoŭ ab likvidacyi praŭładnaj Biełaruskaj sacyjalna-spartyŭnaj partyi.
23.08.2023 / 13:53
Sudździa Natalla Andrejeva pačnie praces, inicyjavany Ministerstvam justycyi, 4 vieraśnia ŭ 15:00, piša «Pozirk».
Pavodle danych z Adzinaha dziaržaŭnaha rehistra, BSSP zarehistravanaja 9 śniežnia 1994 hoda.
Partyja palityčna nieaktyŭnaja. Za čas isnavańnia partyi tolki piaciora jaje členaŭ pabyvała ŭ vybarnych orhanach ułady — adzin u statusie deputata Pałaty pradstaŭnikoŭ (2000 hod) i čaćviora ŭ jakaści deputataŭ miascovych Savietaŭ (2018 hod). U asnoŭnym partyja, łajalnaja da režymu Alaksandra Łukašenki, prasoŭvała svaich pradstaŭnikoŭ u vybarčyja kamisii padčas elektaralnych kampanij.
Viarchoŭny sud likvidavaŭ vosiem partyj: apazicyjnyja Kansiervatyŭna-chryścijanskuju partyju — BNF, Partyju BNF, Biełaruskuju sacyjał-demakratyčnuju Hramadu, partyju «Zialonyja», Abjadnanuju hramadzianskuju partyju, a taksama praŭładnyja Biełaruskuju patryjatyčnuju partyju, Respublikanskuju partyju, Sacyjał-demakratyčnuju partyju Narodnaj zhody. Vidać, budzie likvidavana i partyja «Spraviadlivy śviet».
U Biełarusi na pačatak hoda było 15 partyj, zastałosia vosiem z ulikam navastvoranaj partyi «Biełaja Ruś» abo siem, kali paličyć «Spraviadlivy śviet».
Byli pierarehistravanyja Kamunistyčnaja partyja Biełarusi, Libierał-demakratyčnaja partyja, Respublikanskaja partyja pracy i spraviadlivaści.