ГУБАЗіК прыйшоў і да сяброў дзяўчыны, пра затрыманне якой мы паведамлялі раніцай
Яны былі на адным фота з пратэстаў.
23.08.2023 / 17:30
Ілля Янкоўскі і Дар'я Агрызка. Фота: іхнія старонкі Укантакце
Раніцай мы паведамілі пра затрыманне Аліны Будай, але, аказаваецца, сілавікі звярнулі ўвагу і на яе сяброў.
Ілля Янкоўскі, як сцвярджае канал сілавікоў, прыйшоў у ГУБАЗіК сам, бо патрапіў на фота, дзе былі ён і ягоныя сябры. Яму 31 год, і, згодна з інфармацыяй ад «Кіберпартызанаў», ён нядоўга працаваў у «Зелянбудзе». Апошнім часам, мяркуючы па сацсетках, мужчына працуе ў Расіі — у 2019-ым гэта была будаўнічая кампанія.
ГУБАЗіК сцвярджае, што пасля таго, як ён дабраахвотна прыйшоў да іх у аддзяленне, замест утрымання ў СІЗА ён атрымае падпіску аб нявыездзе, а пакаранне, хутчэй за ўсё, не будзе звязанае з рэальным пазбаўленнем волі.
Наколькі вядома «Нашай Ніве», затрымалі і 31-гадовую сяброўку Аліны Будай — Дар'ю Агрызка. Яна знікла з усіх сацсетак у той жа момант, што і яе сяброўка.
Дзяўчына скончыла фармацэўтычны факультэт Віцебскага дзяржаўнага медыцынскага ўніверсітэта. Вучылася на бюджэце з добрым сярэднім балам, а пасля адпрацоўвала ў адной з мінскіх аптэк.
Яшчэ адна дзяўчына, паказаная ў відэа ГУБАЗіК на супольным фота, ужо адбывае пакаранне па артыкуле 342 КК за ўдзел у пратэстах. Яна атрымала пакаранне ў выглядзе «хіміі» або «хатняй хіміі», калі меркаваць па спісках праваабаронцаў.
Мяркуючы па ўсім, людзей апазналі па супольным фота, якое знайшлі ў аднаго з іх пасля затрымання з іншай нагоды або ў сацсетках.
Чытайце таксама:
Распазнаванне твараў: што гэта такое, як яно працуе і якія здольнасці беларускіх сілавікоў
Як надзейна вычысціць фоты з вашых смартфонаў — падрабязны гайд