Aleha Rudakova z žonkaj aryštavali na 30 sutak
Zatrymanaha ŭ Połackim rajonie byłoha kiraŭnika tavarystva biełaruskaj kultury ŭ Irkucku i jahonuju žonku aryštavali na 30 sutak. Pra heta paviedamlaje «Pozirk» sa spasyłkaj na krynicu, jakaja pažadała zastacca nienazvanaj.
25.08.2023 / 20:05
Fota: BiełTA
Rašeńnie vynies sud Połackaha rajona i Połacka pa art. 19.11 KaAP (raspaŭsiudžvańnie ekstremisckich materyjałaŭ). Pryčynaj aryštu stali kamientary Aleha Rudakova i jaho žonki Volhi ŭ internecie.
Pavodle słoŭ krynicy, Rudakovych zatrymali ŭ ich domie ŭ vioscy Biaździedavičy 24 žniŭnia.
«Milicyja skazała, što ich adviazuć u horad «na razmovu» hadziny na try, tamu jany nie brali z saboj źmiennych rečaŭ i srodkaŭ hihijeny. U vyniku — 30 sutak kožnamu», — skazaŭ surazmoŭca.
Aleh Rudakoŭ naradziŭsia ŭ Biełarusi, ale bolš za 30 hadoŭ pražyŭ u Rasii, stvaryŭ i na praciahu 17 hadoŭ uznačalvaŭ u Irkucku tavarystva biełaruskaj kultury imia Jana Čerskaha. U 2020 hodzie kančatkova viarnuŭsia ŭ Biełaruś.
Jahonaja žonka Volha viadzie majstar-kłasy pa tradycyjnym biełaruskim arnamiencie ŭ połackim Muziei tradycyjnaha ručnoha tkactva Paazierja.
Čytajcie taksama:
U Połackim rajonie zatrymali Aleha Rudakova i jaho žonku Volhu