Вайсковая контрвыведка СБУ атакавала аэрадром у расійскім Курску
Контрвыведка СБУ атакавала аэрадром у расійскім Курску ў ноч на 27 жніўня. Там размяшчаюцца самалёты і сродкі СПА. Пра атаку «РБК-Украіна» распавялі крыніцы ў Службе бяспекі Украіны.
27.08.2023 / 16:47
Ілюстрацыйнае фота: facebook com / SecurSerUkraine
Як паведамляюць крыніцы выдання, дроны-камікадзэ адпрацавалі па чатырох самалётах Су-30 і адным МіГ-29. Таксама сярод паражоных цэляў — радары комплексу С-300 і два «Панцыры».
Амаль усе беспілотнікі СБУ даляцелі да сваіх цэляў, паводле папярэдняй інфармацыі, толькі тры з іх былі збітыя сродкамі СПА Расіі, піша «РБК-Украіна».
«Мяркуючы па тым, што нават самі расіяне зафіксавалі як мінімум 13 выбухаў, «бавоўна» атрымалася ўражальнай. Дакладныя наступствы паражэнняў і колькасць загінулых і параненых даведаемся найбліжэйшым часам», — дадалі ў СБУ.
За аперацыяй стаялі вайсковыя контрразведчыкі з 13-га Галоўнага ўпраўлення СБУ.
Гэтай ноччу ў Курску прагрымелі выбухі. Мясцовыя жыхары ў сацсетках паведамлялі, што таксама чулі аўтаматныя чэргі. Пазней у сеціве былі апублікаваныя кадры з момантам выбуху, на іх зафіксавана яркая ўспышка ў начным небе.
Дом у Курску пасля трапляння беспілотніка. Фота: gubernator_46 / Telegram
Губернатар Курскай вобласці пацвердзіў, што Курск спрабавалі атакаваць дронамі. Аднак ён заявіў, што толькі нібыта адзін дрон трапіў у шматпавярховік.