Чэрачань: Без Лукашэнкі мы можам быць уцягнутыя ў сур'ёзныя разборкі
Экс-кандыдат у прэзідэнты на выбарах 2020 года, лідар ліквідаванай Беларускай сацыял-дэмакратычнай Грамады Сяргей Чэрачань лічаць, што цяпер у краіне складаная сітуацыя.
28.08.2023 / 10:59
Сяргей Чэрачань. Лета 2020 года. Фота: «Наша Ніва»
«Ля нашых межаў ідзе вайна. Беларусь адчувае вельмі моцны ціск з боку калектыўнага Захаду. Ёсць сур'ёзная асцярога, што без Лукашэнкі ў гэты момант часу мы акажамся ўцягнутымі ў сур'ёзныя разборкі, і сітуацыю не атрымаецца ўтрымаць нават на тым узроўні напружання, якое існуе цяпер», — паведамляе «Народная Воля».
Сяргей Чэрачань мяркуе, што людзі цяпер не гатовыя рызыкаваць [выходзіць на пратэсты]. Але нармальная палітыка і эканоміка адназначна патрэбныя.
«У парламенце патрэбная альтэрнатыва, нават у адзінкавым экзэмпляры. Але перадумовы, што ўлада гатовая да гэтага, адсутнічаюць», — кажа бізнэсовец-палітык.
Ён таксама не бачыць рызыкі вайсковай пагрозы для Беларусі з боку Польшчы, краін Балтыі.
«Пасля сітуацыі ва Украіне я ўжо не магу адназначна адказаць на гэтае пытанне, але на мой погляд рызыкі адсутнічаюць як з боку краін Балтыі, Польшчы, так і з боку Беларусі. Усе працэсы выключна палітычныя і не маюць дачынення да рэальнай ваеннай пагрозы», — мяркуе ён.
Сяргей Чэрачань таксама не верыць у поўнае закрыццё межаў.
«Поўнага закрыцця межаў не будзе. Але сумна тое, што такім чынам, улады нашых суседніх краін у першую чаргу абстрагуюцца ад звычайных беларусаў. Абмежаваць перасоўванне для ўсіх — залішне-паказальная мера», — падсумаваў экс-кандыдат у прэзідэнты.
Чытайце таксама:
Сяргей Чэрачань заявіў, што будзе ўдзельнічаць у прэзідэнцкіх выбарах 2025 года