Ajcišnik źjechaŭ u Polšču na paŭtara miesiaca, a viarnuŭsia dachaty «darmajedam». Jak tak atrymałasia?
Uładzimir Zadarožny, eks-rabotnik Rozum Robotics, raspavioŭ u siabie ŭ LinkedIn sumnuju historyju. Pavodle słoŭ ajcišnika, usiaho praz paŭtara miesiaca adsutnaści ŭ Biełarusi jaho pryznali darmajedam. Dev.by pierakazała jahonuju historyju.
29.08.2023 / 14:48
Varšava. Fota Paweł Toczyski / Getty Images
Uładzimir pracavaŭ jak QA/QC Engineer u Rozum Robotics («teściravaŭ pradukcyju, bolšaha skazać nie mahu — vusny «pasšyvanyja»), ale prykładna 2,5 miesiacy tamu zvolniŭsia z kampanii.
— Ja pajšoŭ tamu, što chacieŭ kiravacca da mary, — piša ajcišnik. — Tak, mahčyma, ja byŭ naiŭny, kali zvolniŭsia i pajechaŭ u Polšču ŭ pošuku novych mahčymaściaŭ, u nikudy… Heta značyć, što novaha miesca pracy ŭ mianie nie było na toj momant, ale ja raźličvaŭ, što nieŭzabavie prajdu «ciažkaści asimilacyi» i ŭładkujusia ŭ jakuju-niebudź kampaniju. «Bo ŭ mianie taki dośvied!»», — dumaŭ ja.
Nie vyjšła, nie prakaciła… Pražyŭ paŭtara miesiaca ŭ siabroŭ u Varšavie (absalutna biaspłatna), novaja praca tak i nie źjaviłasia. Tak, byli sumoŭi, z adnoj kampanijaj ja prajšoŭ navat čatyry (!) etapy. Na apošnim zdaŭsia i skazaŭ, što my vidavočna nie padychodzim adno adnamu. Heta było pierad tym, jak ja źjechaŭ nazad u Minsk, kab nie psavać adnosiny ź siabrami, u jakich ja žyŭ.
Nie viedaju, ci słušnaje heta było rašeńnie ŭ toj momant, ale hałoŭnymi arhumientami byli:
- Kali nie mahu znajści tut pracu, zdymać ciapier žyllo budzie niapravilna i doraha, bo ŭ Minsku ja mahu žyć u siabie doma (nie płaciačy arendy), a pracu šukać dystancyjna.
- Para pierastać napružvać siabroŭ svajoj prysutnaściu, choć jany vielmi dobryja da mianie i kazali: «Zastavajsia, ty rana zdaješsia».
Łahična, praŭda? Voś ja i sabraŭ «manatki» i pajechaŭ nazad u Minsk.
Vyjaviłasia, što tut situacyja sumnaja ch10. Niama ni pracy, ni sumoŭjaŭ, ničoha… Što rabić? Dahetul nie viedaju. Ale samym «krutym» było atrymańnie siońnia tak zvanaj «žyroŭki».
U žyroŭcy skazana: «Zroblena pavodle taryfu, jaki zabiaśpiečvaje poŭnuju kampiensacyju ekanamična abhruntavanych vydatkaŭ na jaje akazańnie». Pryhoža, praŭda? 2 miesiacy i 14 dzion nie pracuješ, i ŭsio, ty ŭžo «darmajed».
U razmovie z nami Uładzimir dadaŭ, što patelefanavaŭ na daviedačny numar, paznačany ŭ «žyroŭcy». Tam jamu adkazali, što ŭsio vystaŭlena pravilna. Zhodna z pastanovaj Savieta ministraŭ, FSAN sumiesna z Pamiežnym kamitetam farmujuć śpisy «darmajedaŭ», jakija zatym pieradajuć u RDC. I paśla hetaha ŭžo farmujecca rachunak za kamunalnyja pasłuhi.
U kamientarach ajcišniku dajuć roznyja parady — jak nakont źniaćcia «darmajedstva», tak i nakont pošuku pracy. Naprykład, kamientatary rajać:
- zdać kvateru/pakoj. (Da darmajedaŭ nie adnosiacca, u pryvatnaści, «hramadzianie, jakija atrymlivajuć dachody ad zdačy ŭ najom žyłych i niežyłych pamiaškańniaŭ, mašyna-miescaŭ, — pry ŭmovie vypłaty padachodnaha padatku fizičnych asob z takoha dachodu». — Zaŭv.)
- Albo aformić ramieśnictva.
- Albo stać na ŭlik jak biespracoŭny, zatym aformić u administracyi rajona (a dakładniej, u kamisii pa kaardynacyi pracy pa sadziejničańni zaniataści nasielnictva) zajavu ab ciažkaj žyćciovaj situacyi, i «paśla hetaha darmajedstva miesiacy na try zdymuć».
Što tyčycca pracy, to adny pišuć, što» lipień—žnivień naohuł miortvy siezon», i «nievialiki ruch pačynajecca čysła z 20 žniŭnia».
A inšyja — što pošuki mohuć raściahnucca prykładna na hod. «Ja taksama tak zvolniłasia, 9 miesiacaŭ nie mahła znajści pracu», — napisała kamientatarka.
— Ci škaduju ja pra toje, što pastupiŭ nastolki biezrazvažna, zvolniŭšysia sa staroj pracy, nie znajšoŭšy novaj? Naŭrad ci. Viadoma, heta mianie začapiła, bo ja nikoli nie traplaŭ u takuju situacyju. Ale admoŭny dośvied — taksama dośvied, — ličyć Uładzimir.
Pavodle jahonych słoŭ, jon rassyłaje reziume z 2 červienia, i pakul «vynik nulavy». Tak što ciapier ajcišnik šukaje lubuju pracu — nie tolki ŭ jakaści QA, ale jašče i majstra pa ramoncie telefonaŭ, kampjutaraŭ i da t. p. (tak jak «byŭ dośvied pracy ŭ SC»), i navat vykładčyka IT-kursaŭ. Kali ŭ vas jość vakansija na prymiecie, pišycie Uładzimiru ŭ LinkedIn.
Čytajcie taksama:
«Tut IT nie panaceja». Biełarus raskazaŭ, jak jano — vučycca ŭ Narviehii
«Heta jaje štodzionnaja praca». Ajcišnik płacić svajoj žoncy štomiesiačny zarobak