U Brahinskim rajonie adrazu vosiem žycharoŭ asudzili za «raspaŭsiudžvańnie ekstremisckich materyjałaŭ»
Jašče dvoje trapili pad administracyjny pieraśled za niaspraŭnuju techniku, patrebnuju vajskoŭcam.
02.09.2023 / 23:38
Brahinski rajvykankam. Ilustracyjnaje fota: gomeljust.gov.by
Troje žycharoŭ rajona raskazali «Našaj Nivie», što ŭ druhoj pałovie žniŭnia ŭ Brahinie i haradskim pasiołku Kamaryn byli zatrymanyja ź dziasiatak čałaviek. Niekatoryja ź ich pracujuć u lasnoj haspadarcy. Siarod schoplenych byli taksama piensijaniery.
1 vieraśnia ŭ raskładzie Brahinskaha suda było paznačana ažno 8 administracyjnych spraŭ za «raspaŭsiudžvańnie infarmacyjnaj pradukcyi, uniesienaj u respublikanski śpis ekstremisckich materyjałaŭ» (2 častka artykuła 19.11 KaAP).
«Ekstremisckimi materyjałami» łukašysty pryznajuć usio, što niečym nie adpaviadaje aficyjnaj ideałahičnaj linii: niezaležnyja ŚMI, telehram-kanały, jutub-kanały, staronki ŭ sacsietkach, knihi i h. d.
Spravy na Irynu Hiermiel, Ihara Safonava, Aleha Maksimienku, Siarhieja Litašenku, Viačasłava Smykoŭskaha, Mikałaja Udoda, Uładzimira Sačavu razhladaŭ sudździa Alaksiej Jaščanka.
Staršynia Brahinskaha suda Maryja Haŭrylenka zajmałasia spravaj Alaksandra Šubienki.
Sudździ Brahinskaha suda, jakija razhladali palityčna matyvavanyja spravy na žycharoŭ rajona: Maryja Haŭrylenka i Alaksiej Jaščanka. Fota: bragin.by
Čałaviek, znajomy ź situacyjaj, paviedamiŭ «Našaj Nivie», što ŭsich abvinavačanych aštrafavali «pa maksimumie», i ciapier jany na voli. Maksimalny štraf — 1100 rubloŭ (30 bazavych vieličyń).
11-tysiačny Brahinski rajon, adzin z samych małanasielenych u krainie i samy radyjacyjna zabrudžany, miažuje z Ukrainaj. Tut niamała siamjaŭ, jakija majuć rodzičaŭ u susiedniaj krainie. Da rasijskaj ahresii miaža nie była pieraškodaj dla kamunikavańnia z ukraincami. Ciapier ža miž krainami paŭstaŭ amal niepieraadolny mur.
1 vieraśnia ŭ Brahinskim sudzie razhladali jašče dźvie administracyjnyja spravy za «nievykanańnie vajenna-transpartnych abaviazkaŭ» (artykuł 24.40 KaAP). Takija pravaparušeńni vyjaŭlajucca ŭ chodzie pravierak hatoŭnaści mašyn da vajskovych mabilizacyjnych kampanij.
Pravavyja normy abaviazvajuć uładalnikaŭ transpartnych srodkaŭ, pryznačanych dla vykarystańnia ŭzbrojenymi siłami ci śpiecyjalnymi farmavańniami, dbać, kab jany byli na chadu ŭ luby čas. U advarotnym vypadku adkaznym pahražaje štraf da 11 100 rubloŭ (300 bazavych vieličyń).
U Brahinskim rajonie abvinavačanymi za nievykanańnie takich abaviazkaŭ stali Uładzimir Novik, hałoŭny inžynier u adnym ź miascovych sielhaspradpryjemstvaŭ, a taksama Dźmitryj Kamar. U sudovym raskładzie było paznačana, što ich spravy razhladaŭ Alaksiej Jaščanka. Hetyja spravy ŭ takim kantekście taksama mohuć być palityčnymi.
Hladzicie taksama:
Na Paleśsi zabaranili naviedvać lasy tam, dzie byli łahiery rasijskich vajskoŭcaŭ
Achovu Čarnobylskaj AES mahli vyvieźci ŭ Brahin — ukrainski bok