Biełarusam nie pakažuć najbujniejšych spartyŭnych spabornictvaŭ novaha siezona — Ejsmant
Biełteleradyjokampanija nie płanuje kuplać žyvyja tranślacyi novaha siezona Lihi čempijonaŭ pa futbole, jaki startuje 19 vieraśnia, a taksama čempijanatu Jeŭropy-2024 u Hiermanii. Pra heta vydańniu Tochka.by skazaŭ kiraŭnik BT Ivan Ejsmant.
06.09.2023 / 17:04
«Biełteleradyjokampanija Lihi čempijonaŭ pakazvać nie budzie, u nas niama pravoŭ na hety prajekt, my nie ŭdzielničali ŭ tarhach. Pra Jeŭra-2024 pakul nie dumali, ale, mnie zdajecca, taksama nie, pakul razmoŭ pra heta nie idzie», — adznačyŭ Ejsmant.
Što tyčycca Alimpijady-2024 u Paryžy, to nakont jaje, pavodle Ivana Ejsmanta, zastajecca niamała pytańniaŭ.
«A Alimpijada budzie ŭ Paryžy? A my budziem udzielničać z rasijanami? Nie viedaju, ci varta pakazvać Alimpijskija hulni, kali tam nie budzie našych spartśmienaŭ.
Pytańnie ŭdziełu jašče nie vyrašana. Ale na terytoryi Biełarusi niama tarhoŭ pa Alimpijadzie. Nu, nie i nie. My z hetaj nahody mocna nie pieražyvajem. Takaja Alimpijada nam nie patrebnaja», — skazaŭ čynoŭnik.
Prakamientavaŭ jon i situacyju z tranślacyjaj matčaŭ čempijanatu śvietu ŭ Katary vosieńniu-zimoj 2022 hoda. Tady da apošniaha abmiarkoŭvałasia mahčymaść pakazać mundyjal biełaruskim zaŭziataram, ale ŭ vyniku ŭsio admianiłasia. Pavodle viersii Ejsmanta, za pakaz niekatorych spabornictvaŭ BT uniesła pieradapłatu, ale hrošy im nazad nie addali, «pa sutnaści, jany byli skradzienyja». Tamu jon, maŭlaŭ, i nie choča bolš z hetym mieć spravu.
Čytajcie taksama: