У цэнтры Гродна адкрылі новы гіганцкі мурал. На ім гісторыя горада
У дворыку на Маркса, 11 у Гродне напярэдадні Дня горада адкрылі мурал. Ён складаецца з 12-ці арак, а ў іх адлюстраваныя сюжэты, прысвечаныя гісторыі Гродна і паляванню. Плошча мурала — больш за 430 кв. м, піша Hrodna Life.
07.09.2023 / 21:20
Мурал у дворыку на Карла Маркса, 11. Крыніца: старонка Леаніда Шчаглова ў Instagram
Адкрыццё прымеркавалі да Дня горада, якое будуць адзначаць 9 верасня. Ініцыятар стварэння мурала — уласнік прыватнай галерэі халоднай зброі «Арсенал» і былы шматгадовы дырэктар Гродзенскага мясакамбіната Анатоль Грышук. Аўтар мурала — гродзенскі мастак Уладзімір Качан.
За ўзор былі ўзятыя гравюры старажытных майстроў. Да іх дадалі віды горада. На выявах можна ўбачыць пажарную каланчу, вуліцу Замкавую, а таксама аленя святога Губерта. Стары замак выявілі ў сучасным выглядзе, а таксама так, як ён выглядаў на вядомай гравюры Мацея Цюнта.
«Гэтую ідэю мы прыдумалі разам з маімі сябрамі, сярод якіх былі творчыя асобы. Спачатку былі думкі паклікаць дзяцей і размаляваць сцяну графіці, але потым вырашылі зрабіць па-іншаму», — сказаў Анатоль Грышук «Вячэрняму Гродну».
Мурал у гродзенскім дворыку на Карла Маркса, 11. Крыніца: старонка Леаніда Шчаглова ў Instagram
Паводле слоў Грышука, са сродкамі на стварэнне мурала дапамаглі яго сябры. Сярод іх не толькі гродзенцы. Маўляў, ніхто не адмовіўся паўдзельнічаць у праекце, а «двое пакрыўдзіліся, што ім не прапанавалі».
Побач са сцяной высадзяць кветкі і кусты. На клумбе ўсталявалі металічную скульптуру аленя, якую Грышуку падаравалі на 50-годдзе. Таксама ёсць скульптуры каваля, які куе меч, і чалядніка, які разагравае агмень.
Чытайце таксама:
У Гродне памянялі дату святкавання Дня горада ўжо трэці раз за тры гады
У Расонах з'явіўся мурал з каласамі, валошкамі і бусламі
На выхадзе са станцыі метро «Інстытут культуры» з'явіліся прыгожыя муралы