Rasijanie zaraz mohuć trapić u Litvu tolki aŭtobusam abo pieššu
Pry ŭjeździe ŭ Litvu na zarehistravanym u Rasii aŭtamabili budzie pahražać kanfiskacyja.
12.09.2023 / 10:55
Ilustracyjny zdymak. Fota: Omar Marques / Anadolu Agency via Getty Images
U vypadku ŭjezdu ŭ Litvu na zarehistravanym u Rasii aŭtamabili, kiroŭcu, ruch jakoha nie ažyćciaŭlajecca praz kalininhradski tranzit, budzie pahražać kanfiskacyja aŭtamabila, kaža namieśnik ministra zamiežnych spraŭ Jovita Nielupšene. Tak jana prakamientavała abnoŭlenaje tłumačeńnie Jeŭrapiejskaj kamisii, jakoje zabaraniaje luby, navat časovy, uvoz aŭtamabilaŭ z Rasii ŭ Jeŭrasajuz, piša Delfi.lt.
«Kožny, chto pierasiakaje miažu, niachaj heta budzie hramadzianin Rasii abo hramadzianin ES, kali jon jedzie z zarehistravanymi ŭ Rasii (aŭtamabilnymi) numarami i ŭ jaho niama dakumientaŭ, jakija paćviardžajuć, što jon karystajecca kalininhradskim tranzitam, pavinien być papiaredžany ab tym, što jaho aŭtamabil pry ŭjeździe budzie kanfiskavany», — padkreśliła Jo. Nielupšene ŭ efiry telekanała LRT u paniadziełak.
«Zaraz hramadzianie Rasii mohuć pierasiakać miažu tolki pry najaŭnaści ŭ ich takoha prava — na aŭtobusie ci pieššu», — padkreśliła jana.
U abnoŭlenych u piatnicu tłumačeńniach Jeŭrakamisii paviedamlajecca, što aŭtamabili abo inšyja asabistyja pradmiety, jakija padpadajuć pad sankcyi, jak fotaaparaty, noŭtbuki, telefony, cyharety, pryłady dla haleńnia, šampuń, myła i inšyja tavary, nie mohuć być uviezienyja na terytoryju ES navat časova.
Čytajcie taksama:
Jeŭrasajuz zabaraniŭ rasijanam ujazdžać u ES z asabistymi smartfonami i aŭtamabilami