У Гомельскай вобласці праходзяць беспрэцэдэнтныя чысткі ў аграрным сектары
За апошні час у Гомельскай вобласці затрыманы дзясяткі кіраўнікоў сельгаспрадпрыемстваў, а таксама чыноўнікі райвыканкамаў, якія курыруюць сельскую гаспадарку. Толькі за апошні тыдзень сілавікі раскрылі падрабязнасці дзвюх новых крымінальных спраў. «Флагшток» расказвае, што вядома пра крымінальныя працэсы над аграрыямі.
20.09.2023 / 10:36
Ілюстрацыйны здымак. Фота: Гомельщина официально / Telegram
Добрушскі раён
У Добрушскім раёне фігурантамі крымінальнай справы сталі супрацоўнікі амаль усіх сельскагаспадарчых арганізацый раёна. У якасці падазраваных і абвінавачаных выступіла больш за 40 чалавек, многія з якіх з'яўляліся кіраўнікамі сельгасарганізацый. Па версіі следства аграрыі займаліся прыпіскамі з мэтай прадэманстраваць высокія паказчыкі вытворчасці і рэалізацыі малака. У выніку рэальныя аб'ёмы вытворчасці малака ў Добрушскім раёне былі завышаны на 5 тыс. тон.
Былы першы намеснік старшыні Добрушскага райвыканкама Яўген Ігнаценка
Галоўным вінаватым у злачыннай схеме названы першы намеснік старшыні — начальнік упраўлення сельскай гаспадаркі і харчавання Добрушскага райвыканкама Яўген Ігнаценка. Чыноўніка райвыканкама разам з дырэктарамі сельгаспрадпрыемстваў таксама абвінавачваюць у крадзяжах паліва і будаўнічых матэрыялаў, учыненых з выкарыстаннем службовых паўнамоцтваў. Агульны памер нанесенай шкоды склаў больш за 133 тыс. BYN. Абвінавачаным пагражае да 10 гадоў пазбаўлення волі.
Рэчыцкі раён
Былы намеснік старшыні Рэчыцкага райвыканкама Віталь Помаз
Намеснік старшыні Рэчыцкага райвыканкама Віталь Помаз, які курыраваў сельскую гаспадарку, таксама адпраўлены за краты. Былы кіраўнік абвінавачваецца па артыкуле 425 ч. 3 КК РБ «Перавышэнні службовых паўнамоцтваў». Максімальнае пакаранне па дадзеным артыкуле - 10 гадоў пазбаўлення волі.
Разам з чыноўнікам па справе праходзяць некалькі кіраўнікоў і бухгалтараў сельгаспрадпрыемстваў.
Па версіі следства Віталь Помаз у перыяд з лістапада 2021 года па студзень 2023 года даваў указанні кіраўнікам сельскагаспадарчых прадпрыемстваў скажаць статыстычную справаздачнасць з мэтай утойвання падзяжу буйной рагатай жывёлы. У гэты ж час чыноўнік узначальваў камісію па супрацьдзеянні карупцыі ў сельскай гаспадарцы Рэчыцкага раёна.
Іншыя працэсы над аграрыямі
Шматэпізодныя крымінальныя справы ў дачыненні да аграрыяў Гомельскай вобласці ў апошні час сталі распаўсюджанай з'явай.
Летам 2022 года на лаве падсудных апынуліся адразу чатыры дырэктары сельгаспрадпрыемства Кармянскага раёна. Іх таксама абвінавацілі ў службовай падробцы і перавышэнні службовых паўнамоцтваў.
Вясной 2023 года ў Гомелі судзілі першага намесніка старшыні Веткаўскага райвыканкама Сяргея Заблоцкага. Былога чыноўніка абвінавацілі ў лабіраванні продажу непрыдатнага для ўжывання кармавога дадатку «Зеол 3» сярод гаспадарак Веткаўскага раёна. За ўдзел у злачыннай схеме па закупцы прэпарата судзілі яшчэ некалькі чалавек, у тым ліку дырэктара ААТ «Мілкавіта» Віталя Нікуліна .
Суды над кіраўнікамі сельгаспрадпрыемстваў праводзіліся таксама ў Гомельскім і Мазырскім раёне. Іх адметнай рысай стаў паказальны характар. Судовыя паседжанні праводзіліся непасрэдна ў райвыканкамах з прысутнасцю кіраўнікоў іншых сельскагаспадарчых арганізацый раёна.
Чысткі ў аграрным сектары супалі па часе з прызначэннем на пасаду старшыні камітэта па сельскай гаспадарцы і харчаванні Гомельскага аблвыканкама Дзмітрыя Петражыцкага. Увосень 2017 года ён быў са скандалам звольнены з гэтай пасады з патрабаваннем Лукашэнкі ўзбудзіць крымінальную справу. Крымінальнай справы ў дачыненні да Петражыцкага не было, затое яны масавай пачаліся ў дачыненні да іншых кіраўнікоў пасля яго вяртання на пасаду. Вясной 2023 года Дзмітрый Петражыцкі быў назначаны першым намеснікам старшыні Гомельскага аблвыканкама.
Чытайце таксама:
У тыкток выклалі шакуючае відэа з цялятамі па шыю ў гнаі. Чыноўнікі тлумачаць, што здарылася