Jak biełarusy prachodzili raźmierkavańnie i kasili ad adpracovak
Na niadaŭniaj naradzie ŭ Łukašenki zakranuli pytańni raźmierkavańnia studentaŭ. Łukašenka prapanuje pavialičyć termin adpracovak dla biudžetnikaŭ i metavikoŭ, a taksama ŭvieści adpracoŭku dla studentaŭ-płatnikaŭ. «Naša Niva» pahutaryła z maładymi ludźmi pra toje, jak prachodziła ich raźmierkavańnie.
24.09.2023 / 09:15
Krama ŭ Minsku, dzie imkniecca zastacca na raźmierkavańnie bolšaść vypusknikoŭ. Ilustracyjnaje fota: Contributor Getty Images
Imiony surazmoŭcaŭ źmienienyja.
Kaciaryna, doktarka
«Ja pastupała va ŭniviersitet pa metavym nakiravańni. Umovy byli takija, što paśla zaviaršeńnia navučańnia ja musiła viartacca dadomu i tam 5 hadoŭ pracavać u rajonnaj balnicy. Na momant, kali mnie było 17, taki varyjant zdavaŭsia pryvabnym, bo heta faktyčna aznačała harantyju pastupleńnia na biudžet», — zhadvaje dziaŭčyna.
Doktarka kaža, što, pažyŭšy ŭ vialikim horadzie, jana davoli chutka zrazumieła, što nie choča viartacca ŭ rajcentr.
«Pytańni adpracoŭki pačali mocna turbavać chiba paśla treciaha kursa, bo treba było niešta rabić, kab zastacca ŭ Hrodnie, a nie viartacca ŭ horad z nasielnictvam kala 20 tysiač čałaviek. Pryblizna z taho času pačaŭsia aktyŭny pošuk budučaha muža», — pryznajecca dziaŭčyna.
Na šostym kursie Kacia vyjšła zamuž. Paśla byŭ jašče hod internatury, a kab joj nie daviałosia jechać pa raźmierkavańni paśla jaje zaviaršeńnia, maładyja ludzi vyrašyli zavieści dzicia.
«Praŭda, usio adno vyjšła, što pierad adychodam u dekret mnie daviałosia na paŭtara miesiaca pierajechać da baćkoŭ i vyjści na pracu, bo ŭ dekret było jašče rana».
Pakolki dekretny adpačynak doŭžycca krychu bolš za try hady, a adpracoŭka pa nakiravańni — piać, to para zaviała druhoje dzicia. Takim čynam, Kaciaryna i naradziła dvuch dziaciej, i nie adpracoŭvała pa nakiravańni.
Alina, žurnalistka
Minčanka skončyła žurfak pa śpiecyjalnaści «drukavanyja ŚMI» ŭ 2015 hodzie. Pakolki vučyłasia biaspłatna, joj treba było iści pracavać pa raźmierkavańni.
«Mianie nakiravali ŭ adnu z respublikanskich haziet, redakcyja ŭ Minsku była. Zarobak byŭ nievialiki, nakolki pamiataju, płacili ŭ hady raźmierkavańnia kala 700 rubloŭ. Raźmierkavałasia ŭ toje ž vydańnie, dzie prachodziła praktyku. Zajaŭku brała sama, bo heta byŭ niakiepski varyjant ź dziaržaŭnych redakcyj», — kaža dziaŭčyna.
Siarod jaje adnakurśnikaŭ byli studenty, chto pastupiŭ pa metavym nakiravańni.
«Byli tyja, chto sprabavaŭ adkasić praz šlub, ale im heta nie ŭdałosia. Kaniečnie, byli tyja, chto paśla ŭniviersiteta pajechaŭ adpracoŭvać u rajonki, ale kali ty prykłaŭ choć krychu namahańniaŭ, to moh znajści sabie miesca, kab zastacca ŭ Minsku», — adznačaje žurnalistka.
Kiryła, vučyŭsia na śpiecyjalista pa telekamunikacyjach
Małady čałaviek skončyŭ BDUIR u 2017 hodzie pa śpiecyjalnaści «śpiecyjalist pa telekamunikacyjach», paśla čaho jaho raźmierkavali na adno ź biełaruskich pradpryjemstvaŭ na pasadu prahramista.
«Sa startu płacili, napeŭna, rubloŭ 800, što niabłaha pa tych mierkach. U toj hod byŭ dvajny vypusk, tamu va ŭsich vypusknikoŭ byŭ cikavy kiejs. Nam adrazu skazali, što raźmierkavańnia niama zusim i treba šukać miesca samim. U jakaści dziažurnaha varyjanta prapanoŭvali niejkuju vajskovuju čaść pad Minskam», — kaža čytač.
Vypuskniki vykručvalisia jak mahli, niekatoryja šukali varyjanty ŭładkavacca choć na čverć staŭki. Častka ludziej, kab adterminavać raźmierkavańnie, pajšła ŭ mahistraturu.
Kryścina, nastaŭnica anhlijskaj movy
Dziaŭčyna pastupała pa metavym nakiravańni, paśla atrymańnia adukacyi jana musiła viarnucca ŭ rodny rajcentr i adpracavać piać hadoŭ nastaŭnicaj anhlijskaj movy ŭ miascovaj škole.
«Pra taki vybar asabliva mocna ja pačała škadavać, kali zrazumieła, što viartacca ŭ maleńki rajcentr i pracavać tam piać hadoŭ nastaŭnicaj za try kapiejki — takaja sabie pierśpiektyva», — pryznajecca dziaŭčyna.
Ad viartańnia na pieryfieryju maładuju śpiecyjalistku vyratavaŭ šlub.
«Na trecim kursie ja paznajomiłasia z chłopcam, jaki vyrašyŭ źviazać svajo žyćcio z vojskam. Kab mnie nie daviałosia jechać pa nakiravańni, my vyrašyli pažanicca, kali ja była na piatym kursie. Kali tvoj muž — vajskoviec, to ciabie pakidajuć z mužam, i možna nie jechać adpracoŭvać pa nakiravańni. Tamu ŭ hetym sensie mnie pašancavała z mužam», — pryznajecca Kryścina.
Nastaśsia, doktarka
«Vučyłasia na biudžecie, ale biez metavaha nakiravańnia, tamu adpracoŭvać mnie treba było tolki dva hady. Skončyła instytut u 2016 hodzie. Chaciełasia zastacca ŭ Hrodnie, ale raźmierkavacca tam biez błatu amal niemahčyma. Tam vučycca šmat dziaciej, u jakich baćki — daktary ci vykładčyki. Jany zvyčajna zastajucca na miescy», — kaža doktarka.
Ilustracyjnaje fota: «Naša Niva»
Dziaŭčyna šukała šlachi, jak vyrašyć pytańnie z raźmierkavańniem, ale cana pytańnia była dla jaje nadta vysokaja.
«Za dapamohu z raźmierkavańniem tady ahučvali sumu 3—5 tysiač dalaraŭ», — zhadvaje dziaŭčyna.
Pa raźmierkavańni Nastaśsia patrapiła ŭ stalicu doktaram chutkaj. Z dvuch hadoŭ jana adpracavała amal paŭtara.
«Padčas internatury ja paznajomiłasia z budučym mužam, paśla vyjšła zamuž i zaciažaryła, tamu dekret skaraciŭ adpracoŭku pryblizna na tracinu, ja viarnułasia ŭ Hrodna, bo asablivaha žadańnia pierabiracca na pastajanku ŭ Minsku ni ŭ mianie, ni ŭ muža nie było», — kaža čytačka.
Aleh, vučyŭsia na łahista
Małady čałaviek rodam z rajonnaha centra ŭ Mahiloŭskaj vobłaści. Vučyŭsia Aleh u stalicy, tam ža zastaŭsia na adpracoŭku.
«Ja pracavaŭ u nievialikaj ekśpiedycyjnaj arhanizacyi. Płacili mnie minimalny mahčymy zarobak, astatniaja častka była pracentam ad prybytku, ale praź niekalki miesiacaŭ z hetym stała składana. Firma była stratnaja, pra heta daviedvalisia pieravozčyki i admaŭlalisia z nami pracavać, tamu zarobak byŭ vielmi nizki», — pryznajecca mužčyna.
Čytajcie taksama:
Abaviazkovaje raźmierkavańnie ŭviaduć i dla płatnikaŭ, a biudžetnikam pavialičać jaho praciahłaść — narada ŭ Łukašenki
«Dzie hetyja ludzi, chto im dazvoliŭ nie pracavać?» Łukašenka ŭziaŭsia za vypusknikoŭ, jakija adkupilisia ad raźmierkavańnia