«Ja nie hatovaja pracavać za ideju». Jak minskija studenty reahujuć na navinu, što ŭ Biełarusi ŭviaduć abaviazkovaje raźmierkavańnie dla płatnikaŭ
Na minułym tydni stała viadoma, što ŭłady z padačy samoha Łukašenki chočuć pavialičyć praciahłaść adpracoŭki pa raźmierkavańni vypusknikoŭ VNU, jakija atrymlivali vyšejšuju adukacyju na biudžetnaj asnovie, a taksama ŭvieści adpracoŭku dla tych, chto vučycca za svaje hrošy. CityDog.io daviedaŭsia, što z hetaj nahody dumajuć studenty-płatniki.
25.09.2023 / 18:44
Kacia (imia źmieniena), studentka 2-ha kursa BDMU
«Niahledziačy na toje, što da kanca ŭniviera mnie jašče daloka, ja ŭsio adno vielmi niehatyŭna staŭlusia da hetaha zakona. U mianie była proćma płanaŭ na hady adrazu paśla zakančeńnia ŭniviersiteta, a zaraz usio treba budzie pieranosić.
Ja chacieła pastupić za miažu ŭ mahistraturu. Mabyć, z hetym pryjdziecca pačakać.
Nakolki ja zrazumieła, kankretnaha terminu pavieličeńnia adpracoŭki jašče niama, ale miarkujecca 7 hadoŭ metavikam, 5 — biudžetnikam i kala 2 hadoŭ płatnikam. Mianie pałochaje pierśpiektyva vydatkavać nieviadoma kolki hadoŭ u nikudy.
Adpracoŭka dla tych, chto płacić za navučańnie niemaleńkija sumy, — poŭnaje tryźnieńnie. Asnoŭnaja masa maich adnahrupnikaŭ — biudžetniki. I ich bolš, viadoma, chvaluje pavieličeńnie terminu adpracoŭki. Niekatoryja płatniki, jak i ja, niezadavolenyja situacyjaj z vypłatami.
Što budzie z tymi, chto vyrašyć niejak paźbiehnuć adpracoŭki, ja navat ujavić nie mahu. Na moj pohlad, heta poŭnaje tryźnieńnie. Ja płaču za navučańnie kožny siemiestr, a zaraz, kali nie zachaču adpracoŭvać, to taksama pavinna budu vypłačvać hrošy? Kudy jašče bolš i adkul ich uziać?
Kali ŭviaduć kryminałku, to ŭsio maksimalna sumna. Nie dumaju, što da hetaha dojdzie, ale ciapier ja ŭžo i nie viedaju, čaho čakać. Chaciełasia b atrymać narmalnaje staŭleńnie da ludziej jak da važnaha i hałoŭnaha składnika krainy. Pakul da hetaha daloka».
Miša (imia źmieniena), student 3-ha kursa BDUFK
«Mnie absalutna nie padabajucca naviny ab raźmierkavańni. I heta jašče miakka skazana. Ja nie razumieju, čamu ja pavinien adpracoŭvać svaje ž hrošy. Pakul nie viedaju, što z hetym rabić.
Mahčyma, mianie heta nie zakranie, a tolki tych, chto budzie pastupać z nastupnaha hoda. Adnak ja ni ŭ čym nie ŭpeŭnieny. Naša dziaržava ŭmieje ździŭlać.
Maje adnahrupniki dumajuć hetak ža, jak i ja. Złuje jašče i toje, što z taho momantu, jak ja pastupiŭ, adukacyja kožny hod daražeje. Lepš nie stanovicca, tolki horš.
Tady naśpiavaje słušnaje pytańnie: a navošta naohuł atrymlivać adukacyju ŭ Biełarusi? U toj ža Polščy možna vučycca za tyja ž hrošy, i nie treba budzie adpracoŭvać. Dy i jeŭrapiejski dypłom bolš prestyžny. Abmiarkoŭvali hetuju temu ŭ hrupie šmat razoŭ — mierkavańnie va ŭsich adnolkavaje.
Što tyčycca taho, što budzie pahražać tym, chto zachoča niejak paźbiehnuć raźmierkavańnia, to, dumaju, tut moža być što zaŭhodna. Štrafy, kryminałka, zabarona na vyjezd, płata za adpracoŭku — usie hetyja miery całkam pracoŭny varyjant, na moj pohlad. Nie čakaju ničoha dobraha.
Pa vyniku, zamiest taho kab pryciahvać studentaŭ dobrymi ŭmovami, dziaržava prosta zakručvaje hajki i zmušaje nas źjazdžać tudy, dzie ŭmovy lepšyja. Mnie zdajecca, prablema niedachopu śpiecyjalistaŭ stanie tolki vastrejšaj. Mahčyma, kali jaje nie vyrašać, to dalej rušać uśled jašče bolš žorstkija miery ad dziaržavy».
Nataša (imia źmieniena), studentka 5-ha kursa zavočki MDŁU
«Da MDŁU ja vučyłasia ŭ linhvahumanitarnym kaledžy, tudy ja taksama pastupała na płatnaje. Pryncypova nie chacieła iści na «biudžet», kab nie było nijakaha raźmierkavańnia. Užo tady chadzili čutki ab ukaranieńni hetaha novaŭviadzieńnia.
Praz vosiem miesiacaŭ ja pavinna atrymać dypłom. Kali vyjdzie tak, što dakumient ustupić u siłu i płatnikam pryjdziecca raźmiarkoŭvacca, to ja prosta zapłaču hrošy za ŭsio navučańnie. Miarkuju, što košt navučańnia na majoj śpiecyjalnaści moža varjiravacca ad 4000 da 6000 rubloŭ. U cełym zmahu vypłacić.
Mnie nie škada hetaj sumy. Bolš mnie škada dvuch stračanych marna hadoŭ u jakoj-niebudź škole, dzie ja budu atrymlivać (daj boh) rubloŭ 500. Ja vučusia na vykładčycu anhlijskaj i nie źbirajusia marnavać čas u škole. Ciapier pracuju nie pa śpiecyjalnaści i chaču nadalej zastacca ŭ svajoj kampanii. Na svajoj pasadzie ja atrymlivaju ŭ 4,5 razu bolš, čym kali b była nastaŭnicaj.
U hrupie my nie padymajem hetaj temy. Razmaŭlała adzin raz pra heta ź siabroŭkaj. Jana źbirajecca adpracoŭvać. Inšych mierkavańniaŭ nie čuła. Niadaŭna zadumałasia pra sud i śledstva za ŭchileńnie ad raźmierkavańnia. Chutčej za ŭsio, abaviazkova buduć prymianiacca niejkija miery, inakš nijak. Mahčyma, navat kryminalny pieraśled.
U mianie jość unutrany strach, što na niejki čas ja mahu być nievyjaznoj. Ale, mnie zdajecca, ja tut pierahinaju pałku. Adnak usio moža zdarycca. U lubym vypadku ja vybiraju siabie i karjeru. Pracavać za ideju pakinu kamu-niebudź inšamu».
Maryna (imia źmieniena), studentka 3-ha kursa jurydyčnaha kaledža
«Da prapanovy ŭvieści zakon ab raźmierkavańni dla płatnikaŭ staŭlusia niehatyŭna. Adnym ź plusoŭ iści na płatnaje navučańnie zaŭsiody było toje, što paśla zakančeńnia ty pojdzieš pracavać tudy, kudy tabie zachočacca, abo praciahnieš spakojna vučycca. U mianie ŭ płanach byŭ druhi varyjant.
U kampanii adnahrupnikaŭ abmiarkoŭvali hetuju temu ŭ styli: «A vy bačyli, što ŭłady robiać? Zusim užo sumleńnie stracili». Što rabić, kali hety zakon ustupić u siłu, nichto nie kaža. Zdajecca, usie navat dumać pra heta bajacca i spadziajucca na lepšaje.
Mahčyma, praź niejki čas za ŭchileńnie ad raźmierkavańnia praduhledziać i štraf, i aryšt. Kali razhaniać hetuju temu, možna praduhledzieć jakuju-niebudź zabaronu na dalejšaje navučańnie ŭ krainie. Abo kali čałaviek nie adpracavaŭ, to ź Biełarusi jaho možna nie vypuskać. Adnak pakul heta ŭsio maje zdahadki. Ničoha kankretnaha pakul nie chaču zahadvać».
Maksim (imia źmieniena), student 4-ha kursa BDATU
«Mianie absalutna nie chvaluje hety zakon. Ja na apošnim kursie, i hetyja novaŭviadzieńni mianie vidavočna nie zakranuć. Liču, što na hety momant płatnikam ničoha nie pahražaje, tamu što ich dahavor byŭ zaklučany biez hetaj umovy ab raźmierkavańni. My i tak płacili hrošy, tamu raźmierkavańnie ŭ nas moža być tolki pa ŭłasnym žadańni.
Siarod siabroŭ i znajomych płatnikaŭ taksama praktyčna niama. Dy i ŭ cełym jany ŭsie minskija. Kali jany i adpraviacca kudyści adpracoŭvać, to taksama ŭ Minsk. Tamu nikoha hetyja naviny nie chvalujuć.
Dla małodšych kursaŭ, chutčej za ŭsio, heta stanie prablemaj. U niekatorych univiersitetach miescy dla raźmierkavańnia nastolki «nijakija», što varyjant pastupleńnia tudy na «biudžet» adpadaŭ aŭtamatyčna. Što ciapier budzie z takimi VNU, ja nie viedaju. Ja rady, što mianie heta nijak nie zakranie».
Čytajcie taksama: