У Жоўтым моры пацярпела крушэнне кітайская атамная падводная лодка — медыя
Брытанская разведка даведалася аб крушэнні ў Жоўтым моры кітайскай падлодкі, на борце якой былі 55 чалавек. Кітай страту субмарыны адмаўляе, піша «Медуза» са спасылкаю на Daily Mail.
04.10.2023 / 10:15
Паводле паведамлення, журналісты атрымалі сакрэтную справаздачу брытанскай разведкі. Згодна з дакументам, раніцай 21 жніўня падводная лодка праекта 093 «Шань» урэзалася ў загароду, устаноўленую ж кітайскім флотам для барацьбы з падлодкамі ЗША і іх саюзнікаў.
У выніку ў кітайскай падлодкі, зламалася сістэма падачы паветра, што прывяло да гібелі ўсяго экіпажа — 55 чалавек.
Daily Mail удакладняе, што незалежных пацверджанняў здарэнню пакуль няма.
Кітай адмаўляе страту падводнай лодкі.
У Мінабароны Вялікабрытаніі адмовіліся каментаваць інфармацыю выдання. У той жа час The Times мяркуе, што ў брытанскім ваенным ведамстве, верагодна, будзе праведзена расследаванне з-за ўцечкі інфармацыі.
Суразмоўцы Daily Mail у ВМС Вялікабрытаніі дапусцілі, што кітайскі флот сапраўды страціў падлодку ў Жоўтым моры. «Цалкам верагодна, што гэта адбылося. Я сумняваюся, што кітайцы звярнуліся б па міжнародную дапамогу па зразумелых прычынах», — заявіў суразмоўца выдання.