Dypłamaty ES nie pajechali ŭ prapahandysckuju pajezdku da ŭkrainskich dziaciej u Navapołack
Dypłamaty ES i Vialikabrytanii nie pajechali na zaprašeńnie MZS Biełarusi sustrecca ŭ Navapołacku z ukrainskimi dziećmi. Ale ŭ pajezdku adpravilisia dypłamaty «družalubnych» krain.
04.10.2023 / 12:32
Pryviezieny ŭkrainski chłopčyk na minskim čyhunačnym vakzale. Fota: BiełTA
Na minułym tydni stała viadoma, što 4 kastryčnika ŭ Biełarusi źbirajucca arhanizavać naviedvańnie zamiežnymi dypłamatami, akredytavanymi ŭ Minsku, miescaŭ «pražyvańnia, navučańnia i azdaraŭleńnia» ŭkrainskich dziaciej, vyviezienych z akupavanych haradoŭ Łuhanskaj vobłaści.
MZS Ukrainy zajaviła, što hetaje mierapryjemstva maje na mecie «lehalizacyju niezakonnaha pieramiaščeńnia ŭkrainskich dziaciej z časova akupavanych terytoryjaŭ». Kijeŭ zaklikaŭ dypłamatyčnyja pradstaŭnictvy ŭstrymacca ad udziełu ŭ «prapahandysckaj pajezdcy biełaruskaha režymu».
Jak piša BIEŁTA, «siońnia zamiežnyja dypłamaty prybyli ŭ Navapołack z aznajamlenčym vizitam. Jany naviedajuć miescy pražyvańnia, navučańnia i azdaraŭleńnia dziaciej ź Lisičanska i Sievieradaniecka».
«Vielmi šyroki pieralik krain — 18 delehacyj, jakija pradstaŭlajuć bujniejšyja krainy śvietu. Heta Kitaj, Indyja, Siryja, Pakistan, Katar, krainy SND, Mazambik i inšyja», — raspavioŭ staršynia harvykankama Dźmitryj Dziamidaŭ.
Jon dadaŭ, što dzieci ź Lisičanska i Sievieradaniecka prybyli ŭ Navapołack 19 vieraśnia i prabuduć da 6 kastryčnika.
Dypłamaty z zachodnich krain u Navapołack nie pajechali. Biez VPN — pa hetaj spasyłcy.
Niezakonny vyvaz z akupavanych terytoryj ukrainskich dziaciej rasceńvajecca mižnarodnaj supolnaściu jak vajennaje złačynstva. Prezident Rasii Uładzimir Pucin i rasijskaja ambudsmienka pa pravach dziciaci Maryja Lvova-Białova za heta ŭžo atrymali ordary na aryšt ad Mižnarodnaha kryminalnaha suda ŭ Haazie. Biełaruskija demakratyčnyja siły źbirajuć materyjały dla MKS, jakija dakazvajuć dačynieńnie da niezakonnaha vyvazu ŭkrainskich dziaciej pradstaŭnikoŭ režymu Łukašenki, uklučajučy i jaho samoha.
U rezalucyi ad 13 vieraśnia Jeŭraparłamient zajaviŭ, što dziejańni Łukašenki i jahonaha režymu možna kvalifikavać jak złačynstvy suprać čałaviečnaści (departacyja abo hvałtoŭnaje pieramiaščeńnie nasielnictva) pavodle Rymskaha statutu i zaklikaŭ Mižnarodny kryminalny sud vydać ordar na aryšt Łukašenki.