Zdajecca, Łukašenka źbirajecca azałacić niekaha na ŭhnajeńniach. Hałoŭčanka sprabavaŭ pieraškodzić
Na naradzie 3 kastryčnika prahučali takija notki, jakija dazvalajuć zrabić vysnovu, što ŭ Alaksandra Łukašenki jość ideja ab nieabchodnaści pradavać usie biełaruskija ŭhnajeńni praz pasiarednictva niejkaj adnoj struktury, a Hałoŭčanku Łukašenka ŭpiknuŭ u niedamovazdolnaści.
04.10.2023 / 19:46
Premjer-ministr Biełarusi Raman Hałoŭčanka. Skrynšot ź videa
«Ź jakoj efiektyŭnaściu my pracujem na kalijnym rynku? Asabliva pa debitorskaj zapazyčanaści? My vyrablajem nie tolki kalijnyja ŭhnajeńni, ale i azotnyja dy fosfarnyja […].
Niekali my zamachvalisia, što stvorym adzinuju mahutnuju kampaniju, jakaja budzie zajmacca.
Heta, Raman Alaksandravič [Hałoŭčanka], tak u vašym uradzie i patanuła ideja. Usio nam štości zaminaje. Moža, nie tolki vam.
Treba ruchacca, nie stajać na miescy, u tym liku ŭ arhanizacyi prodažaŭ, u pieršuju čarhu — u arhanizacyi prodažaŭ. […]
Kamuści nie chočacca, ci jašče niejkija pytańni pieraškadžajuć?» — vystupiŭ učora Łukašenka na ekanamičnaj naradzie sa svaimi čynoŭnikami.
Raniej «biznesmieny ŭdačy», blizkija da siamji Łukašenki, manietyzavali svaje suviazi praz pryvielijavany dostup da resursaŭ i zapatrabavanaj pradukcyi, siarod jakich byli, u pryvatnaści, naftapradukty i pradukcyja mašynabudavańnia.
Siarod inšych, Juryj Čyž i Mikałaj Vierabiej atrymlivali dostup da tannaj pradukcyi dziaržaŭnych pradpryjemstvaŭ i pierapradavali jaje pa schiemie kansihnacyj, pakidajučy ŭ siabie častku — časam vialikuju — prybytku.
Manałoh Łukašenki stvaraje ŭražańnie, što na fonie prablem z realizacyjaj uhnajeńniaŭ, u pryvatnaści — ź vialikaj debitorskaj zapazyčanaściu, — jon padtrymaŭ nieviadoma čyju ideju ab prymusie ŭsich dziaržaŭnych vytvorcaŭ uhnajeńniaŭ realizoŭvać svoj tavar praz adnu kampaniju.
Chto budzie stajać na čale hetaj kampanii ci chto budzie jaje kantralavać, u efiry nie prahučała.
Raniej Alaksandr Łukašenka puskaŭ u kalijnuju śfieru nabližanaha da siabie rasijskaha biznesoŭca Michaiła Huceryjeva.
Ci išła ŭ hetym vypadku razmova pra taho samaha Huceryjeva, z kantekstu niajasna. Jasna tolki, što prapanovu, jakaja dajšła da Łukašenki, sprabavaŭ na etapie padrychtoŭki tarpiedavać premjer-ministr Raman Hałoŭčanka.
Čytajcie taksama:
Pastaŭki biełaruskaha kaliju «iduć pa płanie», ź ich apłataj składaniej
Nakolki realistyčny prahnoz raźvićcia ekanomiki na nastupny hod