«Ci nie kraŭ ja?» Jak ajcišniki prachodziać palihraf dziela pracy
Vydańnie Dev.by pahutaryła sa svaimi čytačami, jakim daviałosia prachodzić palihraf.
06.10.2023 / 16:49
Historyja 1. Sumoŭje ŭ IT
«Heta ž fintech! Niamožna dapuścić da pracy čałavieka z «brudnym» minułym!»
technical support i dealer ŭ fintech-kampanii, Charvatyja (z rełakiejtam)
— Kab atrymać ofier, treba było paśpiachova prajści 5 etapaŭ sumoŭjaŭ, samy apošni — palihraf, pra što papiaredzili zahadzia.
Teściravańnie ja prachodziŭ u Minsku na Tałbuchina, 2. Kampanija razhladała kandydataŭ z usiaho SND i, jak ja zrazumieŭ, paŭsiul mieła kantakty z palihrafołahami.
Mnie treba było ŭ kankretny dzień padyści da hadzińnikavaha zavoda «Łuč» — i patelefanavać čałavieku, jaki zabraŭ by mianie i pravioŭ u ofis. Pamiaškańnie, u jakim pravodziłasia vyprabavańnie, składałasia z dvuch nievialikich pakojaŭ. U pieršym — stoł, dva kresły i kampjutar z datčykami, u druhi nichto nie zachodziŭ i nie vychodziŭ, mnie zdałosia, tam maje zachoŭvacca abstalavańnie.
U mianie nie było dośviedu prachodžańnia palihrafa, na žal. Kab viedaŭ zahadzia, jakija pytańni mnie zadaduć, ja b padrychtavaŭsia, prakruciŭ u hałavie adkazy — i vynik byŭ by inšym.
Rastłumaču, čamu tak dumaju: pierad teściravańniem palihrafołah skazaŭ, što na pieršym etapie jon niekalki razoŭ nazavie 5 vypadkovych mužčynskich imionaŭ — u roznaj paśladoŭnaści i ŭ roznych pytańniach. Nivodnaje ź ich nie vyklikała ŭ mianie asacyjacyj. Ale ja vyrašyŭ pastavić svoj ekśpierymient, abraŭ imia Siamion — i staŭ ujaŭlać, što dobra viedaju hetaha chłopca, nafantaziravaŭ niejkija situacyi ź im ź minułaha.
U vyniku pa zaviaršeńni hetaha etapu śpiecyjalist spytaŭ, ci dakładna ja nie viedaju nijakaha Siamiona: «Ja baču, što hetaje imia vyłučajecca siarod astatnich». Tak ja zrazumieŭ, što palihraf nie praviaraje ciabie na chłuśniu, jon fiksuje usploski tvaich emocyj — i ŭsio.
U chodzie nastupnaha etapu teściravańnia ŭ mianie pytalisia:
- ci kraŭ ja na pracy — adkaz: «Nie», palihraf nie zafiksavaŭ emocyj;
- ci nie było ŭ mianie prablem z ałkaholem — tut byŭ usplosk. Ja nie pju naohuł, ale ŭ mianie vypivaŭ baćka i, adkazvajučy na pytańnie, ja mižvoli zhadaŭ pra jaho;
- było ŭ śpisie taksama pytańnie pra narkotyki. Ja adkazaŭ, što nikoli takim nie bałavaŭsia — i heta praŭda, — ale, kali pracavaŭ u ZŠA, mieŭ pryjacielaŭ, jakija palili traŭku. Ja viedaju jaje pach — jon tut ža paŭstaŭ u majoj hałavie.
Hetyja pytańni zadavalisia znoŭ i znoŭ, u roznaj paśladoŭnaści i varyjacyjach. Nakont reziume pytańniaŭ nie było.
Praz 40-50 chvilin teściravańnie zaviaršyłasia. Pry kancy, kali ja litaralna stajaŭ u dźviarach, śpiecyjalist raptam spytaŭ, čamu ja tak, a nie inakš adreahavaŭ na pytańni pra narkotyki i ałkahol. Vielmi chutka — peŭna, kab ja razhubiŭsia i nie paśpieŭ abdumać adkazy i skazaŭ praŭdu.
Naohuł mnie padałosia, što moj palihrafołah pracavaŭ ci niejak inakš byŭ źviazany ź siłavymi strukturami. Padklučajučy datčyki, jon skazaŭ, što taki ž aparat vykarystoŭvajecca ŭ KDB. A jašče, kali havorka zajšła ab pratestach (nie ŭ časie teściravańnia, a da jaho), jon skazaŭ, što «ŭsio heta padstroiŭ Zachad».
Praź dzień ejčarka paviedamiła mnie, što palihraf ja nie prajšoŭ. Pavodle jaje słoŭ, ja nie adzin taki — jašče adzin kandydat zrezaŭsia ŭ toj ža dzień. Kali ščyra, było vielmi kryŭdna, što ja nie padyšoŭ: vychodziła tak, byccam by ja čałaviek z błahimi schilnaściami, chacia heta niapraŭda.
Navošta naohuł treba było prachodzić palihraf — jak patłumačyli mnie ŭ kampanii, kali b ja supracoŭnikam, atrymaŭ by dostup da klijenckaj bazy i ŭsioj unutranaj infarmacyi. Niamožna było dapuścić da jaje čałavieka z «brudnym» minułym. Heta ž fintech!
Kali ŭ budučyni mnie prapanujuć jašče raz prajści palihraf, kab atrymać ofier, ja pajdu: mnie zdajecca, ja ciapier viedaju, jak pavodzicca na teściravańni, kab dabicca pośpiechu.
Historyja 2. Sumoŭje nie ŭ IT
«Ale što moža skraści, naprykład, teściroŭščyk abo ofis-mieniedžar?»
kiraŭnik hrupy raspracoŭki ŭ vytvorčaj kampanii (nie IT), Biełaruś
— Na pieršym ža sumoŭi papiaredzili, što daviadziecca prajści palihraf.
U kampanii jość štatny śpiecyjalist-palihrafołah, i palihraf prachodziać usie supracoŭniki, navat tyja, što nie niasuć materyjalnaj adkaznaści.
U mianie heta byŭ pieršy dośvied, padčas vyprabavańnia ja nie chvalavaŭsia, ale było vielmi cikava.
Usio prachodziła prykładna jak u filmach: pasadzili ŭ fatel, padklučyli kuču pravadoŭ i datčykaŭ, jakija rehistrujuć dychańnie, puls, elektrapravodnaść skury. Da fatela taksama padviali datčyki, jakija rehistrujuć zrušeńnie.
Spačatku zadavali standartnyja pytańni, kab vyznačyć uzrovień reakcyi: «Vas zavuć Alena?», «U vas 5 palcaŭ?» Potym užo pytalisia:
- ci nie kraŭ ja na papiarednich miescach pracy;
- ci nie padasłali mianie kankurenty;
- ci nie schłusiŭ ja ŭ svaim reziume;
- ci paznačyŭ usiu praŭdu pra svaju adukacyju;
- ci nie prymaju ja narkotyki;
- ci nie złoŭžyvaju ałkaholem.
Śpiecyjalist adrazu papiaredziŭ, što mietodyka niedakładnaja — roznyja ŭspaminy i asacyjacyi mohuć upłyvać na reakcyju. Naprykład, pytańnie ab najaŭnaści sudzimaści časta vyklikaje niadobryja asacyjacyi, navat kali ciabie nie sudzili, — datčyki heta fiksujuć.
Paśla niekatorych adkazaŭ palihrafołah pytaŭsia, jakija dumki pryjšli mnie da hałavy, kali jon ahučyŭ pytańnie.
Teściravańnie doŭžyłasia prykładna hadzinu. Ź ich paŭhadziny, peŭna, syšło na padrychtoŭku i razmovy, jašče paŭhadziny — ułasna na sam palihraf. Padčas vyprabavańnia ja časam nie moh utrymacca ad śmiechu: až vielmi paciešnyja pytańni.
Pra toje, što ja ŭ vyniku prajšoŭ hety etap i mahu pierachodzić na nastupny, mnie paviedamili praz 2-3 dni (biez anijakich detalaŭ). Na ŭsie sumoŭi spatrebiŭsia miesiac. A dalej ja atrymaŭ ofier, i ciapier pracuju ŭ hetaj samaj kampanii.
Na pytańnie, navošta naohuł patrebnaja takaja pravierka na ŭsiu kampaniju i jaje padraździaleńni, ja nie mahu adkazać. Mahčyma, tamu, što na vytvorčaści šmat darahoj syraviny i pradukcyi, jakuju možna skraści.
Ale što moža skraści, naprykład, teściroŭščyk abo ofis-mieniedžar? Saščepki?
Darečy, padčas teściravańnia ja razmaŭlaŭ z palihrafołaham na temu, jak padmanvajuć palihraf. I jon raskazaŭ, što, byvaje, ludzi prychodziać z kancylarskaj knopkaj u abutku i cisnuć na jaje, kab zrabić sabie baluča i zabłytać datčyki na pytańniach, dzie moža ŭspłyć niazručnaja praŭda. Ale palihrafołah daśviedčany — i takija sihnały adroźnivaje.
Čytajcie taksama:
BELPOL daŭ spravazdaču, što jaho kamanda paśpiachova prajšła palihraf