Мая Санду: Яўген Прыгожын планаваў пераварот у Малдове

«Мы не можам гуляць у шахматы з рускімі, калі яны носяць баксёрскія пальчаткі», — заявіла прэзідэнт Малдовы

07.10.2023 / 07:35

Вагнераўцы ў Растове-на-Доне падчас мяцяжу Яўгена Прыгожына. 24 чэрвеня 2023 года. Фота: Фота: Arkady Budnitsky / Anadolu Agency via Getty Images

Прэзідэнт Мая Санду сцвярджае, што заснавальнік ПВК «Вагнер» Яўген Прыгожын, які загінуў у жніўні ў выніку авіякатастрофы ў Цвярской вобласці, планаваў дзяржаўны пераварот у Малдове ў пачатку года, але яго ўдалося прадухіліць. Пра гэта яна распавяла ў інтэрв'ю Financial Times, піша Newsmaker.md.

«Па наяўнай у нас інфармацыі, гэта быў план, падрыхтаваны камандай [Прыгожына]. Яны хацелі, каб антыўрадавыя пратэсты сталі гвалтоўнымі», — сказала прэзідэнт Малдовы.

Паводле яе слоў, «Расія збіраецца павялічыць ціск на Малдову».

«Яны спрабавалі выкарыстоўваць газ, але ў іх не выйшла. Яны спрабавалі зрынуць уладу, і ім гэта не ўдалося. А цяпер яны спрабуюць масава ўмяшацца ў нашы выбары, выкарыстоўваючы вялікія суму грошай», — сказала Санду.

У маі Еўрасаюз увёў санкцыі супраць прарасійскага алігарха Ілана Шора «за дэстабілізацыю сітуацыі ў Малдове». Праз месяц яго партыю прызналі неканстытуцыйнай. На гэтым тыдні Санду звярнулася да еўрапейскіх лідараў з просьбай увесці санкцыі супраць кампаній, звязаных з Шорам, якія ён выкарыстоўвае для пераводу грошай у краіну.

«Мы не можам гуляць у шахматы з рускімі, калі яны носяць баксёрскія пальчаткі», — заявіла Мая Санду.

Яна распавяла, што спецслужбы Малдовы адсачылі прынамсі €20 млн, якія Расія завезла ў краіну для выкарыстання ў палітычных мэтах, але рэальная лічба яшчэ вышэйшая.

«Інструменты, якія яны выкарыстоўвалі для ўвозу грошай, вельмі разнастайныя. На працягу некаторага часу мы бачылі, што грамадзян Малдовы адпраўлялі ў Маскву на самалётах праз Грузію. І кожны з гэтых людзей вяртаўся і вёз па €10 тыс. у апошні час мы бачым, што яны прывозяць банкаўскія карткі, выпушчаныя ў Дубаі. Яны проста раздаюць тысячы картак. Банкаўскія карткі для людзей, якіх яны спрабуюць падкупіць», — заявіла прэзідэнт.

13 лютага Мая Санду заявіла, што Расія плануе здзейсніць у Малдове дзяржаўны пераварот з дапамогай пратэстаў апазіцыі і з прыцягненнем людзей з вайсковай падрыхтоўкай.Заява Санду прагучала праз некалькі дзён пасля таго, як прэзідэнт Украіны Уладзімір Зяленскі, выступаючы ў Бруселі на пасяджэнні Еўрапейскай рады, распавёў, што праінфармаваў Санду аб тым, што ўкраінскай разведцы «ўдалося перахапіць дэталёвы расійскі план дэстабілізацыі палітычнай сітуацыі ў Малдове».

Чытайце таксама:

Малдова знайшла газ танней і адмовілася купляць яго ў «Газпрама»

Кіраўнік малдоўскага «Спутніка», якога выгналі з краіны, аказаўся афіцэрам ГРУ

«Тады ў вас не будзе газу». Малдова сцвярджае, што Расія назвала суму доўгу, узяўшы лічбы са столі

У Малдове прызналі неканстытуцыйнай прарасійскую партыю «Шор». Рашэнне нельга аспрэчыць

«Справа аб спадарожнікавых талерках». Малдова высылае 45 чалавек з пасольства Расіі

Nashaniva.com