Na dyskusii pra biełaruski teatr na fiestyvali «Pradmova» vystupiŭ adno Vyrypajeŭ
Učora, 7 kastryčnika, u miežach fiestyvalu intelektualnaj knihi Pradmova ŭ Varšavie adbyłasia dyskusija «Biełaruski teatr u vyhnańni: jak znajści svoj šlach», raskazvaje reform.by.
08.10.2023 / 12:38
U razmovie musili pryniać udzieł biełaruski teatralny režysior Jura Dzivakoŭ i rasijski režysior Ivan Vyrypajeŭ (maderatar sustrečy — Andrej Maskvin). Ale Jury Dzivakoŭ zachvareŭ — i pa temie ŭ vyniku razvažaŭ u farmacie anłajn tolki spadar Vyrapajeŭ. Volna ci niavolna, atrymałasia, što hołasam niezaležnaha biełaruskaha teatra staŭ rasijski aŭtar.
Heta aburyła teatralnuju supolnaść.
«Vyrypajeŭ raspaviadaje pra biełaruski teatr na fiestyvali Pradmova. U arhanizataraŭ nie źjaviłasia dumki pazvać biełarusaŭ? Pry tym, što teatralnych dziejačaŭ i dziajačak tut da chalery», — padniała pytańnie biełaruskaja teatralnaja režysiorka, muzyka i aktorka Palina Dabravolskaja.
Letaś Pradmova trapiła ŭ padobnuju situacyju. Arhanizatary zaprasili na letašni forum rasijskaha kinakrytyka Antona Dolina — heta spravakavała chvalu reakcyj. U vyniku Dolin ad udziełu ŭ mierapryjemstvie admoviŭsia.
Ivan Vyrypajeŭ viadomy publicy jak režysior filmaŭ «Ejfaryja», «Kisłarod», «Taniec Deli» dy inšych. Jon suzasnavalnik pradziusarskaj kampanii WEDA i z 2014 hoda žyvie ŭ Polščy. Letaś pryniaŭ rašeńnie ab admovie ad rasijskaha hramadzianstva. Tady ž atrymaŭ polskaje. U polskich teatrach jon staviŭ śpiektakli «Dziońnik Žarabcovaj Paliny» (Muziej Paŭstańnia, Varšava), «Dziadzia Vania» (Polski teatr im. Arnolda Šyfmana, Varšava). U 2021 razam ź biełaruskimi i polskimi akciorami pastaviŭ śpiektakl «1.8 m», zasnavany na realnych historyjach palitźniavolenych Biełarusi.