На поўдні Ізраіля знайшлі целы забітых ХАМАС 40 немаўлят, некаторыя з іх былі абезгалоўленыя — СМІ
У кібуцы Кфар-Аза на поўдні Ізраіля знойдзены целы забітых баевікамі ХАМАС 200 ізраільцян, у тым ліку каля 40 немаўлят, некаторыя з якіх былі абезгалоўлены. Пра гэта паведаміла рэпарцёр i24 News, інфармацыю прыводзяць таксама іншыя медыя са спасылкаю на камандзіра Арміі абароны Ізраілю Ітая Верува.
10.10.2023 / 20:30
Ізраільскія сілы дастаюць целы ізраільскіх жыхароў з разбуранага дома, 10 кастрычніка 2023 г., Кфар-Аза. Фота: Ilia Yefimovich / picture alliance via Getty Images
«Гэта тое, чаго я ніколі не бачыў у сваім жыцці. Гэта тое, што я ўяўляў сабе па расказах бабулі і дзядулі ў Еўропе і іншых месцах», — сказаў генерал.
У аўторак ЦАХАЛ прывёз у Кфар-Азу і іншыя месцы, якія атакаваў ХАМАС, дзясяткі замежных журналістаў. Паводле звестак выданняў, там ля пашкоджаных дамоў да гэтага часу ляжаць целы, у тым ліку палестынскіх тэрарыстаў. Журналістаў суправаджала як мінімум адна рота салдат ЦАХАЛ, якія працягваюць расчышчаць тэрыторыю пасля абстрэлаў.
Генерал ЦАХАЛ Ітай Веруў сказаў, што гэта не вайна, а разня: «Вы бачыце немаўлятаў, маці, бацькоў у іх спальнях, у іх ахоўных пакоях, і як тэрарысты забіваюць іх. Гэта не вайна… гэта разня».
Салдат ЦАХАЛа закрывае твар, праходзячы міма целаў баевікоў ХАМАС і ізраільскіх мірных жыхароў, забітых баевікамі ХАМАС, 10 кастрычніка 2023 г., Кфар-Аза, Ізраіль. Фота: Alexi J. Rosenfeld / Getty Images
У пасёлку, як паведамляюць, знойдзены кантэйнер са спаленымі целамі ізраільцян, у тым ліку дзяцей.
Карэспандэнт выдання i24 піша, што ізраільскія салдаты, якія знаходзяцца ў кібуцы, «суцяшалі адзін аднаго пасля таго, чаму ім давялося стаць сведкамі».
«Яны прыбылі, чакаючы горшага, але гэтыя сцэны пераўзыходзяць усё, што можна было сабе ўявіць. Некаторыя салдаты кажуць, што знаходзілі немаўлят з адрэзанымі галовамі, цэлыя семʼі, застрэленыя ў сваіх пасцелях. На дадзены момант каля 40 немаўлятаў і маленькіх дзяцей былі вывезены на каталках», — піша выданне.