U Paryžy z aŭkcyjonu pradaduć karciny Šahała i Sucina
Mastackija tvory ŭradžencaŭ Biełarusi acanili ŭ sotni tysiač jeŭra, i heta tolki papiaredniaja acenka, bo padčas aŭkcyjonu košt moža značna vyraści.
11.10.2023 / 12:46
Na aŭkcyjonie Sotheby's 20 kastryčnika možna budzie nabyć karciny mastakoŭ «Paryžskaj škoły», jakija rodam ź Biełarusi — Chaima Sucina i Marka Šahała, piša «Sputnik».
«Kvietki, hrušy i vinahrad», Mark Šahał. Fota: Sotheby's
Najbujniejšy aŭkcyjonny dom praviadzie ŭ Paryžy tarhi tvorami mastactva, jakija naležać pendźlu samych jaskravych pradstaŭnikoŭ impresijanizmu i madernu.
«Šahał i Sucin nahadvajuć nam pra čas, kali Paryž byŭ centram suśvietu», — havorycca ŭ anonsie aŭkcyjonu doma Sotheby's.
Siarod mnostva łotaŭ možna ŭbačyć pracy Amiedea Madyljani, Rene Mahryta, Anry Macisa, Pjera-Ahiusta Renuara, Hustava Klimta, Pabła Pikasa, Salvadora Dali, Žaana Miro. Usiaho ŭvazie publiki budzie pradstaŭlena 95 rabot.
«Sielski piejzaž u Siery», Chaim Sucin. Fota: Sotheby's
600-800 tysiač jeŭra zajaŭlena na karcinu Chaima Sucina — «Sielski piejzaž u Siery». I heta tolki pačatkovy košt, jaki padčas aŭkcyjonu pry popycie moža značna vyraści.
«Dva bukiety», Mark Šahał. Fota: Sotheby's
Taksama Sotheby's prapanuje amataram sučasnaha mastactva jašče dźvie pracy ŭradženca Viciebska Marka Šahała. Heta «Kvietki, hrušy i vinahrad» i «Dva bukiety» za 220-350 i 200-300 tysiač jeŭra adpaviedna.
U Biełarusi karciny mastakoŭ «Paryžskaj škoły», jakija naradzilisia i vyraśli na biełaruskaj terytoryi, ale viadomaść zdabyli ŭ Francyi, niekalki kupiŭ «Biełhazprambank», kali jaho ŭznačalvaŭ asudžany na 14 hadoŭ Viktar Babaryka.
Čytajcie taksama:
Karcinu Marka Šahała vystavili na aŭkcyjon u Prazie. Startavaja cana niemałaja
Žerar Depardjo pradaŭ skulpturu ŭradženca Biełarusi — pradstaŭnika Paryžskaj škoły
Unučki Marka Šahała padaryli Viciebsku 60 knih ź biblijateki mastaka