Jak žychar Brahina adkazaŭ na pytańnie «Čyj Krym» mihracyjnym uładam Litvy i čamu ciapier šukaje pracu doma
Žychar Brahina Jaŭhien Davydoŭski pracuje na budoŭli administracyjnaha budynka filijała «Brahinski» AAT «Paleśsiebud». Pracuje pa damovie padradu. A jašče ŭ minułym hodzie zarablać na žyćcio jeździŭ u Litvu. Pra toje, čamu Jaŭhien ciapier šukaje pracu doma i čamu pra heta nie škaduje, raskazała vydańnie «Majak Paleśsia».
18.10.2023 / 08:55
Jaŭhien Davydoŭski. Fota: bragin.by
Hod tamu Jaŭhien jeździŭ pracavać mularam vachtavym mietadam u Litvu. «Ab pryvabnych pierśpiektyvach pracaŭładkavańnia ŭ bałtyjskaj respublicy daviedaŭsia ad znajomych», — udakładniaje vydańnie.
Vachtavyja pajezdki ŭ Litvu doŭžylisia hod — pakul nie skončyłasia viza. Kab praciahnuć ich, treba było aformić dazvoł na žycharstva.
Ź listapada 2022 hoda hramadzianie Rasii i Biełarusi, starejšyja za 18 hadoŭ, jakija źviartajucca pa nacyjanalnuju vizu abo dazvoł na žycharstva ŭ Litvie, pavinny zapaŭniać śpiecyjalnuju ankietu.
U joj, akramia inšaha, treba adkazać, ci padtrymlivajecie vy vajnu Rasii va Ukrainie, a taksama na pytańnie «Kamu, na vašu dumku, naležyć Krym?».
Jaŭhien Davydoŭski adkazaŭ — «Rasii». Ci padtrymlivaje jon napad Rasii na Ukrainu, u artykule nie ŭdakładniajecca.
«Palityka ich jasnaja: pierapisali historyju, uzialisia za hieahrafiju. I tak, pavodle vynikaŭ apytańnia, vyznačajuć, chto «praz svaju dziejnaść u minułym ci suviazi ź niedemakratyčnymi režymami» moža stvarać pahrozu nacyjanalnaj biaśpiecy. Tryźnieńnie, dy i tolki. «Demakratyja» tut vyjaŭlajecca ŭ pryhniocie tych, chto vykazvaje adrozny ad aficyjnaha punkt hledžańnia», — tłumačyć rajonka. Jana pryvodzić chłuślivyja prapahandysckija tezisy pra pierapisvańnie historyi i pryhniot ruskich za miažoj dla apraŭdańnia rasijskaj ahresii.
Karespandent dadaje, što, «viadoma, zychodziačy z karyślivych intaresaŭ, možna było kryvadušničać i adkazać farmalna. Ale navošta?»
«Niejkich zavobłačnych hrošaj nie atrymaŭ, u adnosinach ź miascovym nasielnictvam adčuvajecca napružańnie: ruskamoŭnyja ŭ Litvie nie ŭ pašanie. Dy i doŭhaje rasstańnie ź siamjoj, dzie padrastaje dačka, tolki zasmučaje», — razvažaje Jaŭhien.
«Tamu atrymany vierdykt — admova ŭ vydačy DNŽ i zabarona na ŭjezd u Litvu na 5 hadoŭ — nikolki nie zasmuciŭ. U płanach — uładkavacca na pastajannuju pracu. Tut, u Biełarusi», — raskazvaje pra žyćcieśćviardžalnyja płany mužčyny vydańnie.
Darečy, Alaksandr Łukašenka ŭ intervju rasijskamu prapahandystu Dźmitryju Kisialovu 30 listapada 2021 hoda nazvaŭ akupavany Rasijaj ukrainski Krym «de-fakta i de-jure» rasijskim i raskazaŭ, što źbirajecca pryjechać u Krym. Ale dasiul nie zrabiŭ hetaha. Aficyjnaha pryznańnia Kryma rasijskim, jak i tak zvanych «novych terytoryj», z boku Biełarusi taksama nie było.
Pavodle źviestak Departamienta mihracyi Litvy na pačatak žniŭnia, sa studzienia ŭ atrymańni viz i DNŽ admoŭlena 910 hramadzianam Biełarusi. Ich pryznali pahrozaj biaśpiecy krainy. Dazvoł na časovaje pražyvańnie litoŭskija ŭłady nie vydali 337 biełarusam i admovili jašče 121 hramadzianinu Biełarusi ŭ praciahvańni DNŽ. U 205 biełarusaŭ anulavali dazvoły na časovaje pražyvańnie.