Журналіст сцвярджае, што гулец моладзевай зборнай па футболе пабіўся і трапіў у бальніцу ў Партугаліі. Жонка абвяргае
13 кастрычніка «маладзёжка» прайграла партугальцам з лікам 1:6. Але самае цікавае, мяркуючы па ўсім, адбылося пасля разгрому.
18.10.2023 / 13:57
Руслан Лісаковіч. Фота: ФК «Дынама» (Махачкала).
Як напісаў журналіст і інсайдар Улад Татур, пасля паразы гулец беларускай зборнай Руслан Лісаковіч парушыў рэжым і ўлез у бойку. Па звестках Татура, усё скончылася не вельмі добра, і беларус трапіў у бальніцу.
Па некаторых звестках, Лісаковіч апынуўся не проста ў бальніцы, а ў рэанімацыі.
Журналіст пасля дадаў, што Лісаковіч у выніку канфлікту атрымаў сур'ёзныя пашкоджанні і па-ранейшаму знаходзіцца пад кантролем медыкаў у Партугаліі. З гульцом знаходзіцца кіраўнік дэлегацыі Дзмітрый Касянок.
«Рэжым парушыў не толькі Лісаковіч. Вось такая ў нас моладзевая зборная», — наракае Татур.
На наступны матч супраць Харватыі Лісаковіч у заяўку каманды не трапіў.
Жонка футбаліста Ксенія абвяргае інфармацыю пра бойку і шпіталізацыю.
«Гэта ўсё няпраўда, і я шчыра не разумею, каму не дагадзіў Руслан, каб пісаць навіны ўзроўню «жоўтая прэса». З Лісам усё добра», — цытуе Ксенію «Трыбуна».
Руслану Лісаковічу 21 год, ён гуляе за «Дынама» з Махачкалы (другі расійскі дывізіён). Ён лічыцца адным з найбольш таленавітых маладых гульцоў Беларусі. Дэбютаваў за нацыянальную зборную раней за моладзевую. Ягоныя старэйшыя браты Віталь і Дзмітрый таксама футбалісты.
Чытайце таксама:
Англійскі футбольны клуб зняў моцны ролік пра ментальнае здароўе
Беларусам з «чорнага спіса» не дазволілі згуляць за расійскі «Урал» у Барысаве — Трыбуна