U Słucku ŭ mai zdali šmatpaviarchovik, u jakim niemahčyma žyć. Na domie — vielmi trapny murał
Batarei chałodnyja, lift nie zapuścili, damafon nie pracuje. Z takimi prablemami na sajt SlutskGorod źviarnulisia adrazu čaćviora žycharoŭ doma pa vuł. Barysaŭca, 15 u Słucku, jaki byŭ zdadzieny jašče ŭ mai hetaha hoda.
18.10.2023 / 15:01
Dom pa vuł. Barysaŭca, 15 u Słucku zdali ŭ mai hetaha hoda, ale žyć tam dahetul niemahčyma. Fota: slutsk-gorod.by
Žychary doma źviarnulisia pa dapamohu adrazu z tryma prablemami: adsutnaść aciapleńnia, niepracujučyja ŭ dzieviacipaviarchoviku lifty i damafonnaja sistema.
— Z 13 kastryčnika ŭ nas u domie pačali padavać aciapleńnie, ale batarei narmalna nie nahravajucca, jany praktyčna chałodnyja. Nieadnarazovyja zvanki ŭ ŽEU nie dali nijakaha vyniku. Nam kažuć, što ŭ domie staić aŭtamatyčnaja sistema apału, a ŭ padvale jość niejkija datčyki, jakija ŭ zaležnaści ad tempieratury na vulicy rehulujuć tempieraturu ŭ batarejach. I my pavinny paciarpieć, pačakać, kali na vulicy pachaładaje, i batarei pačnuć nahravacca, — paviedamlaje žycharka doma. — Ciapier nočy vielmi chałodnyja, a batarei ŭ mianie «nulavyja», nijakaha ciapła nie dajuć.
Ale rachunak mnie ŭsio roŭna vystaviać. Dyk čamu ja pavinna płacić za aciapleńnie, jakoha niama? Naš dom zdaŭsia ŭ mai, a ŭ nas da hetaha času niama damafona, nie pracuje lift, dyk jašče i batarei chałodnyja.
— Choład žudasny, batarei letnija. Dzieci śpiać u štanach, u škarpetkach i pad dvuma koŭdrami. Pra bardak u padjeździe ja ŭvohule maŭču. Načalnica ŽEU-5 skazała: «Vaźmicie vienik i prymiecicie». Rabotniki da nas chodziać, a tołku niama, — raspaviała inšaja žycharka doma.
— My atrymali kvateru na Barysaŭca, 15, ale žyć tam niemahčyma. Haračuju vadu na vierchnich pavierchach treba spuskać hadzinu, lift nie pracuje, nichto da hetaha času i nie daje adkazu, kali naohuł jon zapracuje. Ale bolš za ŭsio pryvodzić u šok, što da hetaha času batarei ŭ kvatery chałodnyja, — paćviardžaje słovy žycharoŭ jašče adna žančyna.
Karespandent SlutskGorod pasprabavała razabracca ŭ situacyi i pierš za ŭsio patelefanavała ŭ ŽEU-5, na jaki skardzilisia žychary.
Mužčyna na inšym kancy provada paviedamiŭ, u dadzieny momant načalnik adsutničaje, ale jamu viadoma, što bryhada rabotnikaŭ pavinna pryjści zaŭtra, 19 kastryčnika, kab pačać puskanaładačnyja raboty.
— Vychodzić, jašče adnu noč ludzi vymušany buduć znachodzicca ŭ choładzie? — udakładniła karespandent.
Na takoje pytańnie adkazu ŭ supracoŭnika ŽEU nie znajšłosia, i słuchaŭku pieradali inžynieru.
Razmova atrymałasia niepryjemnaja, piša vydańnie, bo pracaŭnica arhanizacyi ad pramych pytańniaŭ sychodziła, padvyšała ton i naohuł prapanavała napisać na elektronnuju poštu.
— Pa lifcie i damafonie źviartajciesia ŭ słužbu zakazčyka. Kaniec suviazi, — adkazała supracoŭnica i pakłała trubku.
Razam z tym u samoj Słuckaj ŽKH karektna rastłumačyli, što sistema aciapleńnia ŭ domie sučasnaja, aŭtamatyčnaja, i mała chto z rabotnikaŭ pradpryjemstva ź joj znajomy. U suviazi z tym, što budaŭnictvam doma zajmaŭsia UKB, pieršyja puskanaładačnyja raboty aciaplalnaj sistemy pavinien ździejśnić padradčyk. Jany zapłanavany na čaćvier, 19 kastryčnika.
Historyja ź liftam, jak vyśvietliłasia, jašče bolš składanaja. Pa hetym pytańni ŭ Słužbie zakazčyka rastłumačyli, što dom sapraŭdy byŭ zdadzieny ŭ mai, ale «pad kryło» arhanizacyi pierajšoŭ tolki ŭ siaredzinie leta. Adnak da hetaha času zapusk lifta nie byŭ zrobleny z pryčyny adsutnaści adkaznaj asoby — i, jak śledstva, adsutnaści rehistracyi.
— Z momantu pieradačy nam doma było praviedziena 6 tarhoŭ, ale ŭdzielničać u ich padradčyki čamuści nie chočuć. Admaŭlajecca navat naš «Liftservis». Nie viedajem, z čym heta źviazana. Apošnija tarhi zakančvajucca 3 listapada, i kali da taho času padradčyk nie znojdziecca, mahčyma, daviadziecca vyrašać prablemu inšymi šlachami, — adkazali vydańniu Słužbie zakazčyka.
Što da damafonnaj sistemy, to tut žycharam prapanavali zaklučyć dahavory z adnoj z arhanizacyj, jakija hetym zajmajucca. U Słucku ich bolš za piać, adrasy dadaje vydańnie.
Admietna, što na takim domie, u jakim «niemahčyma žyć», vielmi simvaličny murał — z vyratavalnikam.