Сахашчык расказаў, ці спрабавалі яго атруціць і якія дакументы скралі з яго машыны ў Чэхіі
«Міністр абароны» ў Аб’яднаным пераходным кабінеце Валер Сахашчык даў вялікае інтэрв’ю праекту «Ток». Сярод іншага ён расказаў, ці сапраўды ён пабываў у берлінскай клініцы «Шарытэ» і што скралі з яго машыны ў Чэхіі.
22.10.2023 / 20:51
Скрын выпуску «Ток»
У верасні мінулага года стала вядома, што Сахашчык двойчы за кароткі час пабываў у бальніцы, а аднойчы самлеў за стырном. Па сімптомах некаторыя меркавалі, што гэта магло быць атручанне. Правяраць гэту версію планавалі ў «Шарытэ», як тады расказвалі «Нашай Ніве».
«Я не быў у клініцы Шарытэ, я быў у іншай клініцы — у Вене. Так, у мяне была выяўлена сур’ёзная праблема са здароўем, але ніякіх падстаў казаць, што мяне атруцілі, няма», — пракаментаваў Сахашчык.
У маі падчас працоўнага візіту ў Чэхію ў палітыка ўзламалі машыну і выкралі з яе «дзве торбы з асабістымі дакументамі», як ён сам паведамляў.
Сахашчык патлумачыў, што тады знікла.
«У мяне дакументы не скралі. Скралі дакументы іншых людзей, рэчы якіх былі ў машыне. Гэтыя дакументы не адносіліся да дзейнасці нашай у складзе Аб’яднанага пераходнага кабінета і наогул дэмакратычнага руху беларускага. Гэта быў асабісты пашпарт аднаго чалавека, правы аднаго чалавека, нейкі нататнік асабісты, таму ніякай пагрозы нічому не магло быць і наступстваў ніякіх не наступіла», — патлумачыў ён.
З рэчаў самога Сахашчыка скралі дарагі яму станок для галення, які падарыў сябар больш за 20 гадоў таму, пену для галення, зубную шчотку.
«У мяне няма падстаў меркаваць, што гэта зрабілі кадэбэшнікі, хоць ускрыццё машыны зрабілі вельмі прафесійна і вельмі хутка і можна меркаваць, што гэта рабіў чалавее высокай кваліфікацыі. Але быў гэта нейкі проста звычайны пражскі злодзей ці людзі, якія працавалі ў інтарэсах беларускага КДБ, я пра гэтага казаць не магу».
Глядзіце інтэрв’ю цалкам: