Жыхарка Варшавы ўратавала 26-гадовага беларуса, які апынуўся на вуліцы пад праліўным дажджом і нічога не памятаў
Жыхарка Варшавы Роза Цыбульска распавяла на сваёй старонцы ў фэйсбуку, як ранкам у мінулую нядзелю выратавала маладога беларуса: напаўголы хлопец стаяў пасярод дарогі пад праліўным дажджом, дрыжаў і не мог гаварыць. Яна выклікала хуткую, а потым яшчэ й пераконвала лекараў, што чалавеку патрэбная дапамога. Пані Роза дагэтуль не ведае, каго яна выратавала: «У хлопца рэтраградная амнезія, ён нічога не памятае з той ночы, апрача таго, што быў у клубе».
25.10.2023 / 08:02
Роза Цыбульска. Фота: сацыяльныя сеткі
У суполках варшаўскіх беларусаў у фэйсбуку актыўна абмеркоўваюць гэты выпадак. Удзельнікі просяць паведаміць імя і прозвішча пацярпелага, калі нехта заўважыць, што хтосьці са знаёмых не вярнуўся дахаты, не прыйшоў на вучобу або на працу.
А таксама згадваюць, што ўжо сустракаліся ў Варшаве з падобнымі выпадкамі — калі людзі пасля наведвання клубаў апынаюцца ў незнаёмых мясцінах, без грошай, мабільнага тэлефона і дакументаў. У каментарах гучаць парады «не злоўжываць алкаголем і наркотыкамі» і быць асцярожней з кактэйлямі — «браць закаркаваныя напоі, каб ніхто нічога не падмяшаў».
Роза Цыбульска ўпэнена, што хлопец не выглядаў так, нібыта проста «перабраў». Калі яна ўбачыла яго непадалёк ад свайго дома, то вярнулася з ім у пад'езд, папрасіла кансьержку выклікаць хуткую, зняла з яго мокрае адзенне і аддала сваё, а ногі накрыла выратавальнай тэрмакоўдрай. Калі стан хлопца пачаў паляпшацца, ён здолеў сказаць, што ён з Беларусі і што яму 26 гадоў.
Фота: фэйсбук Розы Цыбульскай
Жыхарку Варшавы непрыемна ўразіла, што лекары хуткай, якая прыбыла праз 25 хвілін, паставіліся да хлопца без належнай увагі. «Яны сказалі, што ягонаму жыццю нічога не пагражае. І мне давялося пераконваць іх, што вельмі рызыкоўна пакідаць чалавека ў такім стане без дагляду. Прыслухаліся ж да мяне толькі тады, калі я сказала, што маю медычную адукацыю. Хлопца забралі ў машыну, але нават не прапанавалі коўдры, каб сагрэцца».
За спачуванне і неабыякавасць Розе Цыбульскай дзякуюць і палякі, і беларусы. «Pani ma serce Jezusa», — напісала польская дзяўчына.