Masavaja ctralba ŭ štacie Men: nie mienš za 22 zahinułych, 50 paranienych. Złačyncu pakul nie złavili
Uzbrojeny mužčyna adkryŭ stralbu ŭ dźviuch miescach u horadzie Ljuistan u amierykanskim štacie Men. Adlehłaść pamiž imi — šeść kiłamietraŭ.
26.10.2023 / 07:09
Fota: ofis palicyi Ljuistana
Uzbrojeny mužčyna adkryŭ stralbu ŭ horadzie Ljuistan u amierykanskim štacie Men. Paviedamlajecca, što nie mienš za 22 čałavieki byli zabityja, bolš za 50 paranienyja, piša Bi-bi-si.
Pavodle źviestak palicyi, napadnik usio jašče nie abiasškodžany. Palicyja pieraścierahaje, što złačyniec uzbrojeny i vielmi niebiaśpiečny.
Zabojcu zavuć Robiert Kard, jamu 40 hadoŭ.
Čalec haradskoj rady Robiert Mak-Karci paviedamiŭ telekanału CNN, što ŭłady paćvierdzili hibiel 22 čałaviek, a taksama «šmat, šmat paranienych».
Pa paviedamleńni palicyi, vykliki pastupili ź dźviuch miescaŭ — restarana Schemengees i boŭlinh-choła Sparetime Recreation. Adlehłaść pamiž imi składaje 6,5 km, heta paradku 10 chvilin jazdy na mašynie.
Žycharam druhoha pa vieličyni horada štata rekamiendavana schavacca ŭ biaśpiečnych miescach.
Paviedamlajecca, što pakul viaducca pošuki złačyncy, u horadzie ŭviedzieny poŭny łakdaŭn.
Centralny miedycynski centr štata Men paviedamiŭ, što reahuje na «maštabny incydent sa stralboj z šyrokaj kolkaściu paciarpiełych» i ŭ hety momant kaardynuje namahańni ź inšymi lačebnymi ŭstanovami pablizu.
Na svajoj staroncy ŭ sacsietcy Ch palicyja štata Men paviedamiła: «U Ljuistanie dziejničaje aktyŭny strałok. My prosim žycharoŭ schavacca. Kali łaska, zastavajciesia ŭnutry svaich damoŭ i začynicie dźviery».
Raniej ofis akruhovaha šeryfa raspaŭsiudziŭ fatahrafii padazravanaha — pa ŭsioj bačnaści, kadry sistemy videanazirańnia — z prośbaj dapamahčy ŭ vyśviatleńni jaho asoby. Na ich bačny ŭzbrojeny aŭtamatyčnaj vintoŭkaj mužčyna z baradoj i ŭ karyčnievaj kurtcy la ŭvachodu ŭ zabaŭlalny centr.
Fota: ofis palicyi Ljuistana
Akramia taho, palicyjanty apublikavali fota biełaj lehkavoj mašyny, paprasiŭšy źviazacca ź imi ŭsich, kamu jana zdajecca znajomaj.
Bieły dom paviedamiŭ, što prezident Džo Bajden prainfarmavany i praciahnie atrymlivać apieratyŭnuju infarmacyju.