Эксперт выбачыўся за свой каментар «Нашай Ніве». Што здарылася?
Сёння ў «Нашай Ніве» выйшаў артыкул «Belita выпусціла гель для душа, які «ўплывае на эмоцыі». Навуковец: «Гэта інфацыганства». Экспертам у ім выступаў хімік Сяргей Бесараб, які ўжо пасля выхаду артыкула заўважыў у ім непаліткарэктны выраз, за які выказаў публічнае прабачэнне.
01.11.2023 / 21:47
Сяргей Бесараб. Фота: facebook.com/steanlab
Навуковец наракае, што пракаментаваў тэму занадта эмацыйна:
«Добра б проста эмацыйна, але ж з выкарыстаннем выразаў, якія распальваюць нацыянальную варожасць: «Гэтыя гелі — абсалютна таннае інфацыганства, якое эксплуатуе звычайны фізіялагічны эфект».
І пасля таго Бесараб тлумачыць, за што менавіта яму цяпер сорамна. Гэта выкарыстаны тэрмін
«інфацыганства» — «неалагізм, тэрмін з калякамп'ютарнага слэнгу. Азначае ён людзей, якія прадаюць інфармацыйныя прадукты, што не маюць ніякай практычнай каштоўнасці».
Ужо пасля таго, як Сяргей Бесараб ужыў у каментары гэтае акрэсленне і пабачыў яго ў друку, ён зразумеў, што яно абражае цэлы народ. У сувязі з гэтым:
«Прыношу свае шчырыя прабачэнні ўсім прадстаўнікам народа — ромы / рамалэ — за сваю нястрыманасць. Абяцаю, што ўсімі сіламі паспрабую гэты расісцкі неалагізм са свайго лексікону назаўжды зжыць».
«Важна гэта найперш таму, што я хачу быць сумленным з сабой.
Не бывае лепшага расізму і горшага расізму. Ёсць проста расізм. Нельга «адной рукой» асуджаць антысетымізм, а другой прыніжальна адгукацца пра іншы народ.
Асабліва гэта непрымальна для навукова-тэхнічнага спецыяліста. Слова — не верабей…», — завяршае сваё публічнае прабачэнне навуковец.
Чытайце таксама:
«Мае знаёмыя робяць у Акадэміі разлікі для расійскіх ракет». Што адбываецца з беларускай навукай
Беларусь нарошчвае здабычу нафты і выкарыстоўвае новую тэхналогію. Што за яна?