Załužny: Vajna zajšła ŭ tupik. Jana moža zaciahnucca na hady i vymatać ŭkrainskuju dziaržavu
«Hłybokaha i pryhožaha praryvu, chutčej za ŭsio, nie budzie», — miarkuje hałoŭnakamandujučy Uzbrojenymi siłami Ukrainy.
02.11.2023 / 15:47
Valeryj Załužny. Fota: Efrem Lukatsky / AP
Hałoŭnakamandujučy ŭzbrojenymi siłami Ukrainy Valeryj Załužny ŭ intervju vydańniu The Economist zajaviŭ, što situacyja na froncie zajšła ŭ tupik, a ŭkrainski nastup ryzykuje źmianicca pazicyjnaj vajnoj, jakaja moža zaciahnucca na hady. «Hłybokaha i pryhožaha praryvu, chutčej za ŭsio, nie budzie», — skazaŭ Załužny. «Mieduza» pryvodzić asnoŭnaje ź intervju.
Za piać miesiacaŭ nastupu Ukrainie ŭdałosia prasunucca na 17 kiłamietraŭ. U svaju čarhu Rasija 10 miesiacaŭ viała bai za Bachmut, «kab uziać horad [płoščaj] šeść na šeść kiłamietraŭ».
«Jak i ŭ Pieršuju Suśvietnuju vajnu, my dasiahnuli ŭzroŭniu raźvićcia technałohij, jaki stavić nas u tupik», — ličyć Załužny.
Hałoŭnakamandujučy USU pryznaŭ, što było pamyłkaj dumać, što Rasiju možna spynić, abiaskrović jaje vojski. «Rasija straciła zabitymi nie mienš za 150 tysiač čałaviek. U luboj inšaj krainie takija straty spynili b vajnu», — adznačyŭ Załužny. Na jaho dumku, u Rasii žyćcio kaštuje tanna, a Uładzimir Pucin pierajmaje mietady bajavych dziejańniaŭ časoŭ Pieršaj i Druhoj Suśvietnych vojnaŭ.
Załužny raspavioŭ, što płany nastupu USU mierkavali, što ŭkrainskija vojski buduć prasoŭvacca na 30 kiłamietraŭ u dzień, pieraadolvajučy rasijskija abarončyja linii. Jak piša The Economist, hałoŭnakamandujučy «sarkastyčna» dadaŭ: «Kali vy pahladzicie na padručniki NATO i na raźliki, jakija my rabili [pry płanavańni], čatyroch miesiacaŭ nam pavinna było chapić, kab dabracca da Kryma, pavajavać u Krymie, viarnucca z Kryma i znoŭ uvajści i vyjści».
Zamiest hetaha, piša The Economist, ukrainskaja armija, uzbrojenaja zachodniaj technikaj, zatrymałasia na minnych palach pad udarami rasiejskaj artyleryi i bieśpiłotnikaŭ.
«Spačatku ja padumaŭ, što z našymi kamandzirami niešta nie tak, tamu pamianiaŭ niekatorych ź ich. Potym ja padumaŭ, što, moža być, našy sałdaty nie padychodziać, tamu ja pieravioŭ sałdat u inšyja bryhady», — raspavioŭ Załužny. Ale, pavodle jaho, pierastanoŭki nie dali vyniku. Tady jon zahadaŭ svaim padnačalenym znajści knihu Savieckaha hienierał-majora Paŭła Śmirnova «Praryŭ umacavanych linij abarony» 1941 hoda, u jakoj analizavalisia bitvy Pieršaj suśvietnaj vajny.
«I nie pračytaŭšy navat pałovy, ja zrazumieŭ, što my znachodzimsia mienavita tam, bo, jak i tady, uzrovień našaha technałahičnaha raźvićcia siońnia pryvioŭ u tupik i nas, i našych vorahaŭ», — adznačyŭ Załužny.
Hałoŭnakamandujučy USU raspavioŭ pra pajezdku ŭ Aŭdziejeŭku, dzie rasijskija vojski niekalki tydniaŭ sprabujuć vieści nastup.
«Na ekranach našych manitoraŭ u toj dzień, kali ja byŭ tam, my bačyli 140 padpalenych rasijskich mašyn, źniščanych ciaham čatyroch hadzin paśla taho, jak jany apynulisia ŭ zonie dasiažnaści našaj artyleryi», — skazaŭ Załužny. Jon dadaŭ, što i ŭkrainskija vajskoŭcy sutykajucca z takimi ž ciažkaściami, kali sprabujuć nastupać.
«My bačym usio, što robić vorah, a jany bačać usio, što robim my. Kab vyjści z hetaha tupika, nam treba niešta novaje, naprykład porach, jaki vynajšli kitajcy i jaki my da hetaha času vykarystoŭvajem, kab zabivać adzin adnaho»,-ličyć Załužny.
Pavodle jaho słoŭ, kab vyjści ź situacyi, jakaja skłałasia, ukrainskaj armii patrebnyja inavacyi ŭ halinie bieśpiłotnikaŭ, radyjoelektronnaj baraćby i abstalavańnia dla raźminiravańnia, uklučajučy novyja rabatyzavanyja rašeńni. Adnak, na dumku Załužnaha, niama nijakich prykmiet, što ŭ najbližejšy čas taki technałahičny praryŭ adbudziecca.
Tamu, zajaviŭ jon, ukrainskaj armii zastajecca tolki praciahvać nastup, zachoŭvajučy inicyjatyvu, kab nie dazvolić vajnie stać pazicyjnaj.
«Samaja vialikaja ryzyka pazicyjnaj vajny zaklučajecca ŭ tym, što jana moža zaciahnucca na hady i vymatać ŭkrainskuju dziaržavu», — skazaŭ Załužny. Jon taksama adznačyŭ, što Rasiei praciahłaja vajna vyhadnaja. U tym liku tamu, što Zachad moža stamicca ad vajny, a Rasija za hety čas zmoža papoŭnić svaje vajskovyja resursy.
«Nam treba šukać rašeńnie, nam treba znajści hety porach, chutka asvoić jaho i vykarystoŭvać dla chutčejšaj pieramohi. Tamu što rana ci pozna my vyjavim, što ŭ nas prosta nie chapaje ludziej dla baraćby», — skazaŭ na zakančeńnie Załužny.
***
Raniej The Economist apublikavaŭ artykuł Załužnaha, u jakim jon zajaviŭ, što kanflikt pamiž Rasiejaj i Ukrainaj pierachodzić na novy etap pazicyjnaj vajny sa źniasilvajučymi bajami.
Takaja situacyja, papiaredziŭ Załužny, vyhadnaja ŭ pieršuju čarhu Rasiei. «Nielha niedaaceńvać Rasieju. Jana paniesła vialikija straty i vydatkavała šmat bojeprypasaŭ. Ale jana jašče doŭha budzie mieć pieravahu va ŭzbrajeńni, technicy, rakietach i bojeprypasach», — ličyć hałoŭnakamandujučy USU.
Ukrainie, kab pieramahčy, pisaŭ Załužny, patrebnyja novyja, inavacyjnyja padychody, jakija»mohuć znoŭ pieratvaryć hetuju vajnu pazicyj u vajnu manieŭraŭ».
Čytajcie taksama:
Čamu Ukraina nie zdoleła prarvacca da Azoŭskaha mora? I što heta značyć dla rehijona?
Zialenski: Mnie zdajecca, što my znachodzimsia ŭ apošniaj stadyi vajny, ale samaj składanaj
Padalak pra kontrnastup: My adstajem ad hrafika na šeść-dzieviać miesiacaŭ