Śledčy kamitet zavioŭ kryminalnuju spravu ŭ dačynieńni słužbovych asob Łatvii
aściarožna, žorstkaje fota!
«Słužbovyja asoby Łatvii adkažuć za złačynstvy suprać biaśpieki čałaviectva», — zaznačajuć u biełaruskim viedamstvie.
03.11.2023 / 12:01
«Najmity ŭ formie na łatvijskaj miažy vyznačylisia svajoj asablivaj žorstkaściu i aźviareńniem u adnosinach da mihrantaŭ, jakija sprabujuć trapić u krainy Jeŭrasajuza praz Prybałtyku. U parušeńnie patrabavańniaŭ mižnarodnych dahavoraŭ, u tym liku Kanviencyi ab statusie biežancaŭ, Mižnarodnaha pakta ab hramadzianskich i palityčnych pravach, Usieahulnaj dekłaracyi pravoŭ čałavieka, paśladoŭniki jeŭrafašyzmu na sistemnaj asnovie ažyćciaŭlajuć niezakonnuju departacyju, akty žorstkaści i hvałtu, uzbrojenaje vyciaśnieńnie, katavańni i ździeki ŭ dačynieńni da. Niekatoryja achviary pamirajuć u sprobach pierasiačy miažu, a ich cieły vykidvajuć za płot karnyja bataljony Jeŭrasajuza», — paviedamlaje SK, zajaŭlajučy, što achviarami stali ŭžo 12 čałaviek.
Hałoŭnym śledčym upraŭleńniem Śledčaha kamiteta zaviedziena kryminalnaja sprava pa art.128 (złačynstvy suprać biaśpieki čałaviectva) Kryminalnaha kodeksa Respubliki Biełaruś. Pravodziacca nieabchodnyja śledčyja dziejańni, havorycca ŭ paviedamleńni SK.
Dniami Dziaržaŭnaja pamiežnaja achova Łatvii (DPAŁ) zajaviła pra advarotnaje.
27 kastryčnika łatvijskija pamiežniki la dziaržaŭnaj miažy na biełaruskim baku zaŭvažyli hrupu ludziej, jakija pieranosili cieła na samarobnych nasiłkach.
Kab praduchilić mahčymaje niezakonnaje pierasiačeńnie miažy, łatvijskija pamiežniki nakiravalisia na miesca zdareńnia, dzie ŭbačyli, što da łatvijskaj miažy prynieśli čałavieka i pakinuli jaho lažać na ziamli, a pobač ź im pakłali jašče adnaho biez prykmiet žyćcia. Eskałacyi nie adbyłosia, i praź niekatory čas biełaruskija pamiežniki zabrali cieły, paviedamiła Dziaržaŭnaja pamiežnaja achova Łatvii.