Rasijskija špijony paskardzilisia Pucinu na adsutnaść narmalnaj pracy i miescaŭ u dziciačych sadkach — Insider
U rasparadžeńni žurnalistaŭ apynuŭsia kalektyŭny zvarot supracoŭnikaŭ Hałoŭnaha raźviedvalnaha ŭpraŭleńnia da prezidenta Rasii, u jakim jany, siarod inšaha, niezadavolenyja žurnalistami, jakija nibyta kiepska aśviatlajuć «podźvihi» zahinułych va Ukrainie bajcoŭ šturmavych bryhad HRU. Siarod pryčyn dla abureńnia i prapanova žoncy adnaho z aficeraŭ papracavać razvozčycaj picy.
06.11.2023 / 08:58
Dakumient vydańniu The Insider pieradała krynica ŭ Administracyi Pucina. Padpisantami skarhi ŭkazanyja 11 aficeraŭ HRU, uklučajučy namieśnika kamandzira čaści, jaki abiacaŭ vyrašyć prablemy vysłanym ź Jeŭropy piersonam non-hrata, a taksama žonka aficera, jakaja mocna abraziłasia na niedastojnuju prapanovu pracy.
Svaju skarhu padpisanty pačali z kryŭdaŭ na niejkich «zachodnich kamientataraŭ», jakija nanosiać «značnuju škodu dziaržavie i Vajskovaj raźviedcy Rasii»:
«Pavažany Uładzimir Uładzimiravič, u apošni čas u šerahu prazachodnich i suśvietnych ŚMI źjaŭlajucca artykuły, u jakich abvinavačvajuć aficeraŭ Hałoŭnaha ŭpraŭleńnia Hienštaba Rasijskaj Fiederacyi ŭ niekampietencyi i biaździejnaści, a časam i ŭ drymučym nieprafiesijanaliźmie. Niekatoryja kamientatary ŭ sietcy internet dahavarylisia da taho, što śćviardžajuć ab pahałoŭnym pjanstvie i raspuście ŭ kiraŭnictvie Vajskovaj raźviedki Rasii i zaviedama skažonym infarmavańni kamandavańnia Ministerstva abarony i kiraŭnikoŭ dziaržavy napiaredadni praviadzieńnia Śpiecyjalnaj vajennaj apieracyi na terytoryi Ukrainy.
Uładzimir Uładzimiravič, hetyja hałasłoŭnyja fantazii nanosiać značnuju škodu našaj dziaržavie, Vajskovaj raźviedcy Rasii i źjaŭlajucca śviadomymi vydumkami zachodnich kamientataraŭ».
Taksama aŭtary skarhi śćviardžajuć, što zadoŭha da ŭvarvańnia Rasii va Ukrainu špijonam ŭdałosia vyśvietlić dysłakacyju, kolkaść i najaŭnaść uzbrajeńnia ŭ šmatlikich čaściach USU, a taksama dabyć mabilizacyjnyja i apieratyŭnyja płany USU, punkty pierabyvańnia i peŭnyja chatnija adrasy.
Žurnalisty adznačajuć, što da lutaha 2022-ha HRU dakładvała ŭ Kreml realnuju karcinu palityčnaj abstanoŭki va Ukrainie i ŭ svaich daniasieńniach padkreślivała, što rasijskija tanki nichto nie źbirajecca sustrakać z kvietkami. Adnak Pucin daviaraŭ nie raźviedcy, a svajmu kumu Viktaru Miadźviedčuku i biehłym byłym prezidentu Ukrainy Viktaru Janukoviču i premjeru Mikałaju Azaravu, jakija śćviardžali advarotnaje.
Viktar Miadźviedčuk paśla zatrymańnia. Fota Słužby biaśpieki Ukrainy.
U svaim liście vysłanyja ź Jeŭropy rasijskija špijony nahadvajuć Pucinu pra zabitych va Ukrainie bajcach sa šturmavych bryhad HRU, pra jakija «damarosłyja ŚMI» nibyta nie skazali dobraha słova.
The Insider adznačaje, što heta nie adpaviadaje rečaisnaści. Infarmacyju pra śmierci śpiecnazaŭcaŭ HRU možna znajści ŭ šmatlikich ŚMI i Z-kanałach. Tolki abstaviny hibieli i bajoŭ, jakija apisvajuć pravajennyja krynicy, nie adpaviadajuć sapraŭdnym.
U pryvatnaści, 27 lutaha 2022 hoda rasijski śpiecnaz uvajšoŭ u Charkaŭ, dzie ŭ ich byŭ zahad «abjadnacca z prarasijsku nastrojenymi atradami apałčencaŭ». Ale nijakich kałabarantaŭ jany nie sustreli i pačali błukać pa horadzie ŭślapuju. U vyniku ich zabłakavali ŭkrainskija vajskoŭcy. Kinuŭšy techniku i pałovu zbroju, rasijanie ŭkrylisia ŭ budynku škoły, dzie 10 hadzin čakali padkrapleńnia. U vyniku ich rasstralali z tanka. 20 rasijskich hereušnikaŭ zahinuli, 5 adłavili miascovyja žychary.
U kancy zvarota jaho aŭtary skardziacca, što ich vyhnali z sytaj Jeŭropy.
«Dla mnohich aficerskich siemjaŭ niečakany adjezd z dypłamatyčnych misij staŭ asabistaj trahiedyjaj i naradziŭ šmatlikija prablemy. Nam kažuć: paciarpicie i ŭsio ŭładzim chutkim časam. Mnohija žonki, a ŭ mnohich vyšejšaja adukacyja, sami pajšli pracaŭładkoŭvacca, ale hodnych prafiesij i zarobkaŭ prosta niama».
Žurnalisty adznačajuć, što paśla pačatku vajny va Ukrainy ź Jeŭropy vysłali 698 rasijskich dypłamataŭ — amal pałova ź ich aficery HRU, SZR i FSB. Vysłanym supracoŭnikam sprabujuć znajści miescy ŭ rasijskich ambasadach u Afrycy, Azii, Paŭdniovaj Amierycy i krainach SND, ale tam usio zaniata i pakidać nasiedžanyja miescy nichto nie źbirajecca.
The Insider źviazaŭsia ź niekatorymi supracoŭnikami HRU, čyje proźviščy ŭkazanyja ŭ skarzie, ale jany zajavili, što nijakich kalektyŭnych zvarotaŭ da Pucina nie padpisvali. A adzin vykazaŭ zdahadku, što «heta kałamuciać vadu nie sami aficery, a ich žonki».