Biełaruski dyzajnier Hanna Kraśnier pamierła va ŭzroście 43 hady
«Nie vytrymała serca».
08.11.2023 / 09:54
Hanna Kraśnier. Fota: fejsbuk Hanny Kraśnier
«U jaje spyniłasia serca, była chutkaja, reanimacyja ŭ balnicy. Pachavańnie budzie ŭ Varšavie, na pravasłaŭnych mohiłkach u rajonie Vola. Infarmacyja pra čas budzie paźniej», — paviedamlajecca na jaje staroncy ŭ instahramie.
Hanna Kraśnier naradziłasia ŭ Viciebsku. Paśla škoły jana pastupiła ŭ technałahičny ŭniviersitet. Skončyŭšy VNU, jana pa raźmierkavańni trapiła ŭ Mahiloŭ — na fabryku «Viaśnianka», dzie pracavała mastakom. Zatym viarnułasia ŭ Viciebsk i paśla dekreta ŭładkavałasia kanstruktaram adzieńnia ŭ viasielny sałon. Paźniej Hanna stvaryła svaju pieršuju kalekcyju z čatyroch sukienak. Usie pracy jana pradała, piša «Lusterka».
— Ja ryzykavała zhubić hrošy, patračanyja na materyjały. Na ščaście, usio atrymałasia, — raspaviadała dyzajnier.
Hańnie stali pastupać pieršyja zakazy. Nieŭzabavie jana adkryła ŭłasnuju spravu — «Majsterniu Hanny Kraśnier».
Jak pisaŭ sajt Belarus Fashion Week, pracy Hanny adroźnivali «aryhinalny dyzajn, jakasnyja materyjały, ručnaja karpatlivaja praca i prafiesijny pašyŭ».
Raboty majstra nie raz adznačalisia na konkursach mody i pryhažości.
13 lipienia 2021 hoda Hanna napisała ŭ fejsbuku, što zakryła svaju majsterniu ŭ Biełarusi.
«Prosta pryjšoŭ čas niešta mianiać … mianiajem», — patłumačyła majstar.
Nastupny dopis Hanny źjaviŭsia ŭ krasaviku 2023 hoda. Łakacyjaj u im pakazvałasia Polšča.
«U mianie tak časta pytalisia čamu ja bolš nie šyju sukienki. Što paśla čarhovaha čamu, ja vyrašyła, što tak, ja chaču pasprabavać. Ciapier ja šyju sukienki. Pakul nie šmat, pakul u jakaści chobi (vielmi prafiesijnaha chobi) pa paru zakazaŭ u miesiac», — raspaviadała Hanna.