Jakaja kraina z najmienšaj imaviernaściu budzie isnavać praz 100 hadoŭ? Voś jak aceńvajuć šancy Biełarusi
Takoje pytańnie na papularnaj płatformie vyklikała žyvoje abmierkavańnie. Adnym ź lidaram u adkazach stała Biełaruś. Čamu ludzi tak ličać?
13.11.2023 / 12:40
Na forumie Reddit, vielmi papularnym u ZŠA, Kanadzie i Vialikabrytanii, zjaviłasia pytańnie «Jakaja kraina z najmienšaj imaviernaściu budzie isnavać praz 100 hadoŭ». Siarod adkazaŭ karystalnikaŭ bolšaść łajkaŭ (na momant napisańnia hetaha materyjału — 5,9 tysiačy) nabraŭ adkaz «Maldzivy». Druhim pa papularnaści (5,7 tysiačy łajkaŭ) staŭ adkaz «Biełaruś. Jak tolki Łukašenka pamre, jaje znoŭ pahłynie Rasija».
Asobnyja karystalniki pad hetym adkazam patłumačyli, čamu jany taksama tak ličać.
«U 1997 hodzie Biełaruś i Rasija ŭžo padpisali damovu ab Sajuzaj dziaržavie, jakaja zakłała asnovu dla pahłynańnia Biełarusi Rasijskaj Fiederacyjaj», — napisaŭ adzin z karystalnikaŭ.
«U ich ahulny Mytny sajuz (pry ŭjeździe ŭ adnu ci druhuju krainu vy atrymlivajecie adzinuju mihracyjnuju kartu dla abiedźviuch krain) i jany prapanoŭvajuć masu ilhot hramadzianam adna adnoj, adnak u ich svaje asobnyja pašparty. Čort pabiary, ja navat bačyŭ biełaruskaje pasolstva ŭ Maskvie. Biełaruś usprymajecca jak mienšaja, cichaja i bolš hopnickaja viersija Rasii, ale jana pradukuje šmat sielskahaspadarčaj techniki».
Inšy karystalnik napisaŭ, što chutčej za ŭsio pryčyna ŭ palitycy Pucina, jaki imkniecca stvaryć miažu (bufiernuju zonu) pamiž Rasijaj i Jeŭropaj i pry hetym mieć kantrol nad joju. Takaja bufiernaja zona mahła b słužyć abaronaju ad vajennych pahroz. I heta adna z pryčyn, čamu ŭschodnija terytoryi Ukrainy takija kaštoŭnyja dla Pucina.
«Ty maješ racyju. Palityčnaje pahłynańnie krain Rasijaj padryvaje ŭsiu ich (Jeŭropy. — NN) hieapalityčnuju stratehiju, jakaja zaklučajecca ŭ zachavańni bufiera nadziejnych sajuźnikaŭ pamiž Rasijaj i Jeŭropaj», — padtrymlivaje mierkavańnie inšy karystalnik.
Ale znajšlisia tyja, chto vykazaŭ supraćlehłaje mierkavańnie:
«Tak, Rasija zaraz vyhladaje całkam zdolnaj na pahłynańnie inšych krain. Kali Łukašenka pamre, kali nie raniej, Biełaruś stanie demakratyjaj, ustupić u NATA i ES. Rasija vyvodzić vojski i techniku ź Biełarusi. Ciapier u ich niama ni mahčymaściaŭ, ni intaresaŭ u zachopie Biełarusi.
Rasija — hulec, jaki pastajanna padvojvaje staŭki, kab viarnuć svaje straty. Heta zrobić ich zanadta asłablenymi, kab umiašacca ŭ Biełaruś. Kali b jany źmienšyli svaje straty i pakinuli Ukrainu, kali b stała vidavočna, što jany nie mohuć pieramahčy, to ŭ ich jašče b zastalisia siły pahłynuć Biełaruś. Heta było b razumna».
Čytajcie jašče:
Apytańnie: 45% biełarusaŭ, jakija źjechali ŭ Polšču, płanujuć tam zastacca
Biełarusam telefanujuć z rasijskich numaroŭ z sacyjałahičnymi apytańniami. Čym cikaviacca?