Adšukali čałavieka, jaki, mierkavana, pieravodziŭ hrošy Alehu Aksionavu dla KDB
Učora ŭ efiry ANT pakazali, na jakoje imia byŭ zarehistravany rachunak, ź jakoha KDB płaciŭ Aksionavu. Telehram-kanał «Biełaruś hałaŭnoha mozhu» raskazaŭ, što razam z «Kibierpartyzanami» jany adšukali hetaha čałavieka.
20.11.2023 / 17:42
Anton Lemiešaŭ. Fota: telehram-kanał «Biełaruś hałaŭnoha mozhu»
Miarkujecca, što hetym čałaviekam byŭ Anton Lemiešaŭ. Jamu 25 hadoŭ, rodam z Mahilova. Pa źviestkach, jakija telehram-kanału «Biełaruś hałaŭnoha mozhu» pieradali «Kibierpartyzany», jon prachodziŭ terminovuju słužbu va ŭnutranych vojskach.
My daviedalisia taksama, što ź vieraśnia 2013-ha pa maj 2016-ha Anton vučyŭsia ŭ Mahiloŭskim prafiesijnym licei №5 na stanočnika drevaapracoŭčych stankoŭ. Imavierna, paśla vučyŭsia ŭ Biełaruska-rasijskim univiersitecie ŭ Mahilovie, ale niezrazumieła, ci skončyŭ jaho — na 2020-y jon ukazvaŭ, što ŭ jaho siarediaja śpiecyjalnaja adukacyja. A ŭ 2020-m šukaŭ pracu raznarabočym u Mahilovie.
Reziume Antona. Fota: flagma.by
Pa źviestkach «Kibierpartyzanaŭ», jon šmat jeździŭ u Polšču, a pra jahonuju pracu ŭ Biełarusi ničoha nieviadoma.
Jakaja jahonaja rola ŭ apieracyi pa «razvodzie» Aksionava i dziela čaho ANT vyrašyła pakazać jahonyja imia i proźvišča (naŭrad ci vypadkova) — heta hałoŭnaja zahadka.
Nahadajem, aktyvist i juryst Aleh Aksionaŭ staŭ achviaraj śpiecapieracyi KDB — pad vyhladam jeŭrapiejskaj arhanizacyi jaho paprasili chadzić na mierapryjemstvy i «pierapraviarać» toje, jak traciacca hranty ES. Za heta jamu płacili.
U subotu čekisty raskryli karty — jany prapłacili Aksionavu «sieminar pa biaśpiecy» ŭ Biełaruskim moładzievym chabie, ale ŭ efir pad vyhladam «sponsara i arhanizatara» vyjšaŭ namieśnik načalnika śledčaha ŭpraŭleńnia KDB Kanstancin Byčak i prapahandyst Ihar Tur.
Čytajcie taksama:
«Navat takija sivyja babry patraplajuć u pastku». Aleh Aksionaŭ patłumačyŭ, jak jaho raźvioŭ KDB