Мастак Бэнксі пацвердзіў сваё сапраўднае імя — Бі-бі-сі
Агенцтва Бі-бі-сі сёння выклала інтэрв'ю з сусветна вядомым вулічным мастаком пад псеўданімам Бэнксі, якое ладзілася 20 гадоў таму. У ім мастака папрасілі пацвердзіць адну здагадку наконт яго сапраўднага імя, і той яе пацвердзіў. Расказваем, якое імя было названа.
21.11.2023 / 19:29
Кадр з рэпартажу тэлеканала ITV London за 2003 год, на якім, верагодна, паказаны Бэнксі. Фота: ITV News
Аўдыёінтэрв'ю 20-гадовай даўніны пад назвай «The Lost Banksy Story» («Зніклая гісторыя Бэнксі»), выкладзенае сёння на BBC Sounds і прысвечанае сусветна вядомаму мастаку Бэнксі, змяшчае ў сабе ўрывак, у якім мастак пацвярджае здагадку пра сваё сапраўднае імя.
Адбылося гэта падчас адказу на пытанне, якое задаў мастаку ўжо былы журналіст Бі-бі-сі Найджэл Рэнч, які сустрэў Бэнксі на яго першай выставе ў Лондане ў 2003 годзе.
Рэнч спытаў, ці можа ён падчас інтэрв'ю звяртацца да Бэнксі па яго сапраўдным імені, якое да таго моманту ўжо было агучана выданнем The Independent.
Рэнч: Ты не супраць, што я буду называць цябе па імені. Я маю на ўвазе тое, якое раней агучвала The Independent?
Бэнксі: Не супраць.
Рэнч: Ты Роберт Бэнкс?
Бэнксі: Проста Робі.
Рэнч: Робі. Добра, Робі.
Нагадаем, што Бэнксі — гэта самы вядомы графіці-мастак у свеце. Хто хаваецца за псеўданімам, дакладна невядома. У 2017 годзе брытанскі дыджэй Goldie прагаварыўся пра сапраўднае імя Бэнксі і таксама назваў яго Робертам.
За год да гэтага брытанскі журналіст Крэйг Уільямс высунуў тэорыю аб тым, што Бэнксі — гэта заснавальнік трып-хоп групы Massive Attack (і сябар дыджэя Goldie) Роберт Дэль Ная. Уільямс высветліў, што многія працы Бэнксі з'яўляліся ў тых месцах, дзе ў гэты ж час выступалі Massive Attack. Дэль Ная пачаў займацца графіці ў 80-х гадах, ён уваходзіў у графіці-гурт The Wild Bunch з Брысталя. Сам музыкант некалькі разоў заяўляў, што Бэнксі — ягоны блізкі сябар.
У той жа час навукоўцы з Лонданскага ўніверсітэта каралевы Марыі сцвярджалі, што ананімны мастак — гэта жыхар Брысталя Робін Ганінгем.
Дарэчы, як адзначае выданне The Independent, менавіта гэтае імя фігуруе ў нядаўнім судовым пазове супраць Бэнксі і яго кампаніі Pest Control Ltd, у якім брытанскі прадпрымальнік Эндрю Галагер абвінавачвае мастака ў паклёпе. Робін Ганінгем быў пазначаны ў пазове як першы адказчык па справе.
Чытайце таксама:
Беларускага мастака-графіціста падазраюць у размалёўцы вагонаў метро ў В'етнаме
Бэнксі пацвердзіў аўтарства сямі работ, створаных у вядомых месцах Украіны
Карціна Бэнксі самазнішчылася пасля таго, як яе прадалі за $1,1 мільёна ВІДЭА