На плошчы 1000-годдзя Віцебска ўсталююць флагшток «для патрыятычнага ўзбагачэння»
На сайце гарвыканкама з'явілася абвестка пра «папярэдняе інфармаванне» жыхароў наконт новага гарадскога аб'екта пад назвай «Флагшток на плошчы 1000-годдзя Віцебска». Яго дакладныя памеры яшчэ не вызначаны, але ініцыятары ўзвядзення канструкцыі «вышынёй ад 50 да 65 метраў» перакананы, што яна неабходная для «павышэння патрыятыянага выхавання насельніцтва» і «павелічэння значнасці дзяржаўных сімвалаў».
25.11.2023 / 12:30
Плошча 1000-годдзя Віцебска. Фота: jouhny-trep.tourister.ru
«Адмова ад рэалізацыі праекта не дазволіць рэалізаваць згаданыя вышэй мэты і прывядзе да адсутнасці зоны патрыятычнага ўзбагачэння і адпачынку насельніцтва», — гаворыцца ў матэрыялах «папярэдняга інфармавання».
З іншых мудрагелістых фармулёвак вынікае, што гараджан спавяшчаюць не толькі пра флагшток, але і пра «арганізацыю адпаведнага добраўпарадкавання для ўрачыстых цырымоній і экскурсій турыстаў, а таксама будаўніцтва неабходных вонкавых інжынерных сетак у ахоўнай зоне гісторыка-культурнай каштоўнасці «Гістарычны цэнтр Віцебска».
Калі больш канкрэтна, то ў гістарычным цэнры плануюць усталяваць «не меней за два светладыёдныя экраны, канструкцыю для размяшчэння герба Рэспублікі Беларусь і гукавага абсталявання для праслухоўвання гімна, стэлу з назвай плошчы».
Плошча Тысячагоддзя знаходзіцца ў цэнтральнай частцы горада та тэрыторыі былога Ніжнага замка, які існаваў у XIV—XVIII ст. Да 1950-х тут была шчыльная гарадская забудова, якую паступова зносілі. Пасля ўзвядзення будынка драмтэатра імя Якуба Коласа плошчу, якая ўтварылася перад ім, назвалі Тэатральнай. Назва была зменена ў 1974 годзе, калі адзначалася 1000-годдзе Віцебска.
На плошчы, якая часткова забрукавана, а часткова ўяўляе сабой зялёны газон, сёння месцяцца адрэстаўраваны храм ХІІ ст. — Дабравешчанская царква і драўляная царква св. Аляксандра Неўскага. Таксама ў 2016 годзе тут паставілі скульптурную кампазіцыю, якая ўвасабляе прыезд Аляксандра Неўскага ў Віцебск да жонкі і сына. Дзесьці тут плануюць усталяваць і ідэалагічныя аб'екты.
«Папярэдняе інфармаванне» зусім не азначае, што ўлады вырашылі параіцца з мясцовымі жыхарамі наконт увасаблення гэтай ідэі. Віцяблян запросяць толькі на грамадскае абмеркаванне справаздачы аб уздзеянні аб'екта на навакольнае асяроддзе, якое будзе працягвацца з 26 снежня па 25 студзеня ўжо наступнага года.
Імаверна, тады грамадскасці і прадэманструюць, як маюць выглядаць флагшток, стэла, светладыёдныя экраны і ўсё іншае, што збіраюцца ўзвесці ў гістарычным цэнтры горада. Пакуль візуальную частку праекта, апісанага словамі, на сайце гарвыканкама не размясцілі.