Patencyjna rasstrelnaja sprava: kab daviedacca, dzie kampańjon schavaŭ narkotyki, daviałosia jaho zabić
Skvapnaść 29-hadovaha biełarusa pryviała jaho na łavu padsudnych, pryčym sudziać jaho adrazu za zabojstva i za vyrab i raspaŭsiud narkotykaŭ. Ci ŭdałosia daviedacca pra miesca schovu?
04.12.2023 / 13:11
Ilustracyjnaje fota
Historyja pačałasia 4 krasavika 2022 hoda, kali ŭ milicyju pazvaniła žycharka vioski Biarozaŭščyna Barysaŭskaha rajonu i paviedamiła pra mužčynu z nažom u rukach, jaki stukaŭsia ŭ akno jaje doma.
Jak paźniej vyśvietliłasia, mužčynu, jakoha zavuć Sierdar Muchamiedaŭ, razam ź siabram Alaksiejem Šulakom u viosku pryvioz Ihar Šylejka — heta i jość hałoŭny fihurant spravy. Usich ich abjadnoŭvała sprava — raspaŭsiud narkotykaŭ. Nahodaj dla pajezdki staŭ padzieł atrymanych ad biznesu hrošaj.
Prapuściŭšy haściej u dom, Šylejka zjechaŭ. A ŭ domie Šulaka i Muchamiedava sustreli dvoje mužčyn u maskach. Pačałasia bojka, u vyniku jakoj Šulak byŭ zabity. Muchamiedava vyratavała toje, što jon straciŭ prytomnaść. Kali mužčyna pryjšoŭ u siabie, to złačyncaŭ u chacie nie było. Uziaŭšy na ŭsialaki vypadak nož, źbity Muchamiedaŭ vyjšaŭ na vulicu i pajšoŭ šukać dapamohi.
Jak vyśvietliłasia padčas śledstva, Šylejka i Šulak paznajomilisia ŭ adnoj z padmaskoŭnych viosak, dzie była naładžana vytvorčaść mietyłefiedronu.
Častku pradukcyi mužčyny prysabiečvali, kab paśla pradavać. Kali rasijskaja palicyja likvidavała «minizavod», mužčyny, nadzialiŭšy pamiž saboju nakradzienaje, vyjechali ŭ Biełaruś i praciahnuli pracavać na toj ža narkamarkiet u jakaści kurjeraŭ.
Jak vynikaje z materyjałaŭ spravy, spačatku kampańjony pradavali partyju narkotykaŭ, jakuju mieŭ pry sabie Šylejka. Druhaja častka čakała svajoj čarhi i była schavanaja. Miesca viedaŭ tolki Šulak.
Pakolki kampańjon nie chacieŭ dzialicca infarmacyjaj, Šylejka vyrašyŭ vypytać siłaju. Za dapamohaj jon źviarnuŭsia da troch inšych rabotnikaŭ narkamarkietu. Praz znajomaha taksista byŭ arandavany dom u vioscy, u jaki płanavałasia zamanić Šulaka. Paśla atrymańnia nieabchodnaj infarmacyi, jak śćviardžajuć śledčyja, mužčynu płanavałasia zabić. Paśla hetaha ŭsie ŭdzielniki spravy pavinny byli vylecieć u Kazachstan.
Paśpiachovaj realizacyi płanaŭ pieraškodziŭ Muchamiedaŭ, jaki ŭviazaŭsia za Šulakom. U vyniku, kali na ich napali nieznajomyja, mužčyny akazali supraciŭ. Napadniki tak i nie daviedalisia, dzie Šulak schavaŭ narkotyki.
Jak padličyli ekśpierty, mužčynie było naniesiena 57 traŭmaŭ roznaj stupieni ciažkaści. Ale pamior jon ad udušeńnia. Na ciele Muchamiedava było vyjaŭlena nie mienš za 12 traŭmaŭ.
Paśla niaŭdałaj apieracyi Šylejka razam z dvuma svaimi pamahatymi zjechaŭ u Rasiju. Praź niekalki dzion ich usich aryštavali na zdymnaj kvatery ŭ pryharadzie Maskvy.
Ciapier, jak paviedamlaje «SB. Biełaruś siehodnia», spravu razhladaje Minski abłasny sud. Šylejku vystaŭlena abvinavačańnie ŭ vyrabie i raspaŭsiudzie narkatyčnych rečyvaŭ, a taksama ŭ arhanizacyi i padrychtoŭcy zabojstva. Maksimalna mahčymaje pakarańnie pa hetych artykułach — rasstreł.
Čytajcie jašče:
Žychara Navapołacka, jaki zarezaŭ žonku na vačach u dziaciej, pryznali nieadekvatnym
Palicyja Niderłandaŭ zatrymała 57-hadovaha biełarusa pa padazreńni ŭ zabojstvie inšaha biełarusa