Piarścionak z bryljantam koštam 750 tysiač jeŭra znajšli ŭ pyłasosie ŭ paryžskim hateli
Uładalnica kaštoŭnaści, pradprymalnica z Małajzii, u piatnicu zajaviła pra jaho źniknieńnie ŭ palicyju, vykazaŭšy zdahadku, što skraŭ chtości z haściničnaha piersanału.
12.12.2023 / 07:58
Hatel «Rytc». Fota: Evan Lang / Getty Images
Piarścionak koštam 750 tysiač jeŭra, jaki źnik u fiešenebielnym paryžskim hateli Ritz, byŭ znojdzieny ŭ pyłasosie. Haspadynia dumała, što jaho skrali, i źviarnułasia ŭ palicyju, piša Bi-bi-si.
Uładalnica kaštoŭnaści, pradprymalnica z Małajzii, u piatnicu zajaviła pra jaho źniknieńnie ŭ palicyju, vykazaŭšy zdahadku, što jaho skraŭ chtości z haściničnaha piersanału.
Ale achoŭniki znakamitaj haścinicy ŭ niadzielu vyjavili jaho ŭ nietrach pyłasosa, unutry miaška dla zboru pyłu.
Haspadynia tady palacieła z Paryža ŭ Łondan, ale vierniecca nazad, kab zabrać piarścionak.
Pradstaŭniki mižnarodnaj sietki fiešenebielnych haścinic paviedamili presie, što prapanavali žančynie try biaspłatnyja nočy dla kampiensacyi pryčynienych joj niazručnaściaŭ, ale jana, zdajecca, nie źbirajecca pryniać hetuju prapanovu.
«Dziakujučy dbajnaj pracy achoŭnikaŭ siońnia ranicaj piarścionak byŭ znojdzieny. My chočam padziakavać supracoŭnikam paryžskaha hatela Ritz, jakija ŭziali ŭdzieł u pošukach piarścionka i jakija kožny dzień prajaŭlajuć prafiesijanalizm i prystojnaść u svajoj pracy», — było skazana ŭ zajavie Ritz u paniadziełak.
Uładalnica piarścionka paviedamiła palicyi, što ŭ piatnicu jana pakinuła jaho na stale ŭ svaim haściničnym numary, pierad tym jak adpravicca pa kramach u centry horada. Jana adsutničała niekalki hadzin, a kali viarnułasia, piarścionka, upryhožanaha redkim bryljantam, na stale nie było.
Ciapier jon znachodzicca ŭ palicyi i prabudzie tam, pakul haspadynia jaho nie zabiare.
Znakamity piacizorkavy hatel Ritz znachodzicca na Vandomskoj płoščy ŭ samym sercy Paryža. Jon rehularna pryciahvaje zabiaśpiečanych i znakamitych pastajalcaŭ.
Kaštoŭnaści adtul źnikali i raniej.
U 2018 hodzie ŭzbrojenyja siakierami nalotčyki abrabavali juvielirnuju kramu, jakaja znachodzicca ŭnutry, zabraŭšy z saboj upryhožvańniaŭ i kaštoŭnaściaŭ na niekalki miljonaŭ jeŭra.
U tym ža hodzie nienazvanaja pradstaŭnica karaleŭskaj siamji Saudaŭskaj Aravii zajaviła, što ź jaje haściničnaha numara źnikli juvielirnyja rečy na 800 tysiač jeŭra.