Sałodki kašmar
Cukierki bieź miery sapsujuć našym dzieciam nie tolki zdaroŭje, ale i dušu. Piša Barys Tumar.
27.12.2009 / 22:42
Cukierki bieź miery sapsujuć našym dzieciam nie tolki zdaroŭje, ale i dušu. Piša Barys Tumar.
Navahodni padarunak na pracy. Pakiet u škole, ad Dzieda Maroza. Pakiet ad dzieda z babaj. Karobka cukierak ad druhoj baby. Sałodki stoł pierad kanikułami. Jašče adzin – u carkvie na Naradžeńnie Chrystova. I tam jašče adzin kulok, ad Śviatoha Mikałaja. Heta kašmar. Na ščakach pajaŭlajecca vysypka, i možna tolki zdahadvacca, što robicca na zubach i ŭ piečaniach.
Nasamreč, našy dzieci jaduć zašmat sałodkaha, i pierad śviatami hetaje zašmat dasiahaje ŭžo stupieni varjactva.
Čamuści na dni naradžeńnia ŭ sadki i škoły pryniata nasić cukierki. Toje samaje ŭvachodzić u karparatyŭnuju etyku na pradpryjemstvach.
Praźmiernaja luboŭ da sałodkaha — pieražytak biednaści.
U mnohich siemjach u Šviecyi dzieciam dajuć sałodkaje raz na tydzień, u niadzielu. Ale čym biadniejšaja kraina, tym bolš tam spažyvajuć cukroŭ. Zajdzicie ŭ kramu dzieści ŭ Kijevie — tam budzie sorak hatunkaŭ šakaładu, tryccać sałodkich piečyvaŭ, i chiba dva syry dy minimum harodniny.
U niekatorych krainach Treciaha śvietu niezdarovaja dyjeta ŭžo spryčyniła pavalnyja miedyčnyja prablemy. Jak na Tonha, naprykład, dzie piataja častka nasielnictva, z karalom uklučna, pakutuje na cukrovy dyjabiet.
Bajusia, što pierabor desiertaŭ i sałodkaha budzie mieć dla našych dziaciej nie tolki dyjetyčnyja, ale i maralnyja nastupstvy. «My ničoha nie mieli, zatoje našy dzietki chaj ni ŭ čym nie viedajuć admovy», — z hordaściu kažuć babusi i mamusi. I dmuchajuć svaim bejbusam u dupu. I tyja pryvučajucca, što ŭvieś śviet im abaviazany. Što chaču — toje mušu mieć.
Pačućcie miery — heta nie pryrodžany instynkt, a vynik vychavańnia. Abmiežavańnie siabie ŭ sałodkim — akurat adzin sa sposabaŭ jaho vychavańnia.
U miežach asobnaj siamji źmianić ahulnyja zvyčki naŭrad ci vypadaje.
Treba źmiena hramadskaje etyki što da sałodkaha. Źmiena standartaŭ śviatkavańnia i charčavańnia. Heta vialikaja zadača — roŭnaja prablemie kureńnia i złoŭžyvańnia ałkaholem.