Łukašenka znoŭ raskrytykavaŭ urad. Za što na hety raz?
Situacyja z vykanańniem mielijaracyjnych mierapryjemstvaŭ u asobnych abłaściach dalokaja ad idealnaj, zajaviŭ Łukašenka zajaviŭ na naradzie pa pytańniach raźvićcia Biełaruskaj nacyjanalnaj bijatechnałahičnaj karparacyi (BNBK) i praviadzieńnia mielijaracyi.
19.12.2023 / 11:31
Archiŭnaje fota BiełTA
Jon nahadaŭ, što hod tamu na respublikanskim sieminary-naradzie pa pytańniach adnaŭleńnia i vykarystańnia mielijaracyjnych ziamiel byli vyznačany całkam zrazumiełyja zadačy, piša BiełTA.
«Damovilisia ab nieabchodnaści z 2023 pa 2025 hod abjomy mielijaracyjnych mierapryjemstvaŭ patroić u adnosinach da pakazčyka 2021 hoda. Jak mnie dakładvaje profilny vice-premjer, patroili sioleta.
Ale što mianie ździŭlaje: usio pałamana, usio pałamana, ratavać treba mielijaracyju jak halinu. A jak ža ŭ try razy pavialičyli za hety hod? Ci vy chodzicie vydać žadanaje za sapraŭdnaje? Nie atrymajecca», — padkreśliŭ Łukašenka.
Pa jaho słovach, kiraŭniki abłvykankamaŭ abaviazalisia ŭvieści ŭ sielskahaspadarčy abarot u hetym hodzie 110 tys. ha ziamiel. Rašeńni na jaho ŭzroŭni pa finansavańni mielijaracyjnych rabot i zakupcy techniki pryniatyja. «Prytym pryniaty ŭ siaredzinie hoda. Adnak, jak mnie dakładvajuć, u asobnych abłaściach situacyja z vykanańniem dalokaja ad idealnaj», — źviarnuŭ uvahu Alaksandr Łukašenka.
Łukašenka nie pieršy raz krytykuje ŭrad i jaho kiraŭnika Ramana Hałoŭčanku.
20 kastryčnika na naradzie pa pytańniach stratehičnych prajektaŭ jon abvinavaciŭ urad u dezynfarmacyi.
«Ja nie kažu, što heta tradycyja. Ale ja bajusia, kab heta nie stała ŭ Biełarusi tradycyjaj — chłuśnia. Hledziačy ŭ kryvoje lusterka, my krainy nie ŭtrymajem. I novych impulsaŭ joj nie nadadzim, jakija b stratehičnyja ŭ nas płany ni isnavali», — zajaviŭ dva miesiac tamu Alaksandr Łukašenka.
14 lutaha 2023 hoda Łukašenka krytykavaŭ siabroŭ urada za «kiepskuju raspracoŭku» šerahu važnych rašeńniaŭ.
Na naradzie 3 kastryčnika premjer Raman Hałoŭčanka taksama trapiŭ pad krytyku z-za situacyi ź biełaruskim kalijem. «Niekali my zamachvalisia, što stvorym adzinuju mahutnuju kampaniju, jakaja budzie zajmacca. Heta, Raman Alaksandravič [Hałoŭčanka], tak u vašym uradzie i patanuła ideja. Usio nam štości zaminaje. Moža, nie tolki vam. […] Kamuści nie chočacca, ci jašče niejkija pytańni pieraškadžajuć?» — aburyŭsia tady Łukašenka.
Na toj naradzie prahučali takija notki, jakija dazvalajuć zrabić vysnovu, što ŭ Alaksandra Łukašenki jość ideja ab nieabchodnaści pradavać usie biełaruskija ŭhnajeńni praz pasiarednictva niejkaj adnoj struktury, a Hałoŭčanku Łukašenka ŭpiknuŭ u niedamovazdolnaści.