U Sierbii ŭžo tydzień ciahnucca pratesty. Demanstranty šturmavali haradskuju administracyju FOTY
Paśla vybaraŭ, jakija byli 17 śniežnia, u Sierbii pačalisia pratesty. U subotu 24 śniežnia pradstaŭniki apazicyjnaha ruchu «Sierbija suprać hvałtu» atačyli budynak haradskoj administracyi Białhrada, źnieśli ŭ im dźviery i pasprabavali prarvacca ŭnutr.
24.12.2023 / 23:24
Prychilniki apazicyi sprabujuć praniknuć u budynak haradskoj administracyi Biadhrada ŭ znak pratestu suprać vynikaŭ vybaraŭ, 24 śniežnia 2023 hoda. Fota: AP Photo/Darko Vojinovic
Častka demanstrantaŭ raźbiła vokny ŭ padjeździe. Palicyja prymianiła suprać ich ślozatačyvy haz.
U haradskoj administracyi znachodzicca Respublikanskaja vybarčaja kamisija.
Supracoŭniki palicyi achoŭvajuć budynak haradskoj administracyi ŭ Białhradzie, 24 śniežnia 2023 hoda. Fota: AP Photo/Darko Vojinovic
Prezident Sierbii Vučyč zajaviŭ, što nie ličyć pratesty revalucyjaj.
«Ja chaču skazać vam, nie chvalujciesia, hramadzianie. Sceny dramatyčnyja, my nie pryvykli, što chtości razburaje naš dom i raźbivaje vokny. Nie chvalujciesia, tamu što nijakaj revalucyi nie adbyvajecca, i my starajemsia nie naškodzić kamu-niebudź z vypadkovych demanstrantaŭ mirnaj reakcyjaj», — skazaŭ Vučyč.
Fota: AP Photo/Darko Vojinovic
«Dziaržava dastatkova mocnaja, kab abaranić, i jana budzie abaraniać demakratyju i vybarčuju volu hramadzian. I heta ŭsio, što treba viedać. Buntaŭščyki i chulihany buduć zatrymanyja, a potym buduć reahavać kampietentnyja dziaržaŭnyja orhany», — paabiacaŭ Vučyč.
Fota: AP Photo/Darko Vojinovic
17 śniežnia ŭ Sierbii byli daterminovyja parłamienckija i miascovyja vybary. Jany prajšli na fonie abvastreńnia ŭ Kosavie i pratestaŭ, vyklikanych niekalkimi vypadkami masavych zabojstvaŭ sa stralaninaj.
Fota: AP Photo/Darko Vojinovic
Na vybarach pieramahła partyja dziejnaha prezidenta Alaksandra Vučyča (ale ŭ stalicy Sierbii prezidenckaja kaalicyja i apazicyja nabrali blizkuju kolkaść hałasoŭ — 37,48% i 34,38% adpaviedna). Apazicyja zajaviła pra parušeńni i falsifikacyju hałasavańnia. 18 śniežnia ŭ Białhradzie pačalisia pratesty — sabralisia tysiačy prychilnikaŭ ruchu «Sierbija suprać hvałtu».
Fota: AP Photo/Darko Vojinovic
Vučyč 24 śniežnia zajaviŭ:
«Što b vy ni sprabavali zrabić, nie budzie hvałtoŭnaj źmieny ci čahości jašče. Ułada mianiajecca na vybarach, Sierbija —demakratyčnaja kraina».