Kim Čen Yn buduje kurort «typu Ibicy». Za valutu — luby kapryz
Budaŭnictva kurorta pačałosia ŭ 2017 hodzie, ale praz pandemiju raboty prypyniali.
26.12.2023 / 20:06
Vansan u Paŭnočnaj Karei maje stać vizitoŭkaj krainy. Fota Korea News Service via AP
Paŭnočnaja Kareja ŭziałasia budavać kurort «typu Ibicy». Tam majuć prymać turystaŭ z usiaho śvietu.
Paŭnočnakarejski dyktatar Kim Čen Yn choča adkryć elitny kurort u nastupnym hodzie. Budaŭnictva kurorta pačałosia ŭ 2017 hodzie, ale z-za pandemii pracy prypyniali. Kareja ŭvohule całkam zakryvała krainu ŭ adkaz na pandemiju, u spadziavańni adharadzicca ad kavidu, ale biespaśpiachova: miarkujučy pa ŭskosnych źviestkach, karanavirus usio ž pranik u krainu i narabiŭ šmat achviar.
Ciapier Kim choča paskorycca i płanuje za niekalki miesiacaŭ dabudavać na zachodnim uźbiarežžy kurort z akvaparkam, hatelami. Absłuhoŭvać jaho maje aeraport Kałma, pierabudavany z vajskovaha.
Ahułam na paŭvostravie kala Vansana ŭzvodzicca bolš za 150 abjektaŭ.
Plažy ŭ hetym rajonie — pryhažennyja, ale ŭ Paŭnočnaj Karei dostup na plažy — tolki ŭ stroha vyznačanych rajonach i pa prapuskach, kab ludzi nie ŭciakali z krainy.
Plažy ŭ rajonie Vansana — pryhažennyja. Fota Eric Lafforgue/Art In All Of Us/Corbis via Getty Images
Ministerstva zamiežnaekanamičnych suviaziaŭ Paŭnočnaj Karei ciapier pracuje nad pryciahnieńniem zamiežnych inviestycyj — miarkujecca, što z Kitaja i Rasii — i impartam nieabchodnych materyjałaŭ. Praŭda, ekśpierty ŭpeŭnienyja, što sankcyi vyklučajuć pramyja zamiežnyja inviestycyi, navat z Rasii i Kitaja.
Miarkujecca, što na kurort pryjazdžać budzie praściej, čym u samu Paŭnočnuju Kareju, zakrytuju i strašenna biednuju. Pry hetym treba adznačyć, što mnohija demakratyčnyja krainy zaścierahajuć svaich hramadzian ad pajezdak u tatalitarnuju de-fakta manarchiju Kimaŭ, tamu na asablivy turystyčny bum Kim raźličvać naŭrad ci moža. Zrešty, pobač vializny Kitaj i chałodny rasijski Daloki Uschod.
Paŭnočnaj Karei vielmi patrebnaja zamiežnaja valuta, i turyzm — adna z redkich mahčymaściaŭ jaje zarabić. Raniej staŭku na raźvićcio turystyčnych ankłavaŭ zrabiła Kuba.
Čytajcie taksama:
Kim Čen Yn raspłakaŭsia na zjeździe maci
U Paŭnočnaj Karei ŭpieršyniu za 67 hadoŭ ludzi na vybarach prahałasavali suprać