Stała viadoma, što skazaŭ Pucin kiraŭniku KNR nakont terminaŭ vajny va Ukrainie
U sakaviku 2023 hoda padčas vizitu Si Czińpina ŭ Maskvu Uładzimir Pucin zajaviŭ kiraŭniku KNR, što Rasija maje namier vajavać va Ukrainie jak minimum piać hadoŭ. Pra heta paviedamlaje japonskaje vydańnie Nikkei sa spasyłkaj na ŭłasnyja krynicy.
28.12.2023 / 10:17
Si Czińpin padčas razmovy z prezidentam Rasii Uładzimiram Pucinym padčas ich sustrečy ŭ Kramli, 20 sakavika 2023 h. Fota: Sergei Karpukhin, Sputnik, Kremlin Pool Photo via AP
Jak piša vydańnie, heta było papiaredžańniem dla Si nie mianiać svajoj prarasijskaj pazicyi. Tak Pucin sprabavaŭ zapeŭnić Kitaj, što zaciažnaja vajna vyhadnaja Rasii i ŭ kančatkovym rachunku Maskva vyjdzie ź jaje pieramožcam, raspaviadaje Nikkei.
Zychodziačy z hetych słoŭ, vydańnie robić vysnovu ab tym, što nie varta prymać za čystuju manietu sihnały Pucina pa dypłamatyčnych kanałach ab hatoŭnaści da pieramovaŭ ab spynieńni ahniu.
23 śniežnia hazieta The New York Times, spasyłajučysia na svaje krynicy, pisała, što prezident RF ź vieraśnia praz pasiarednikaŭ pieradaje Kijevu i jaho zachodnim partnioram, što hatovy spynić ahoń i zamarozić bajavyja dziejańni ŭ isnych miežach, to-bok pakinuć Rasii akupavanyja terytoryi.
Mahčyma, Pucin choča stvaryć iluziju taho, što ruchajecca da miru napiaredadni prezidenckich vybaraŭ u Rasii, miarkujučy, što takaja atmaśfiera budzie spryjać jamu padčas hałasavańnia, piša Nikkei.
Pry hetym vydańnie miarkuje, što kiraŭnictva Kitaja naŭrad ci daviaraje zajavie Pucina ab namiery vieści vajnu piać hadoŭ.
Pavodle Nikkei, Si Czińpin nibyta zataiŭ kryŭdu na Pucina jašče z kitajska-rasijskaha samitu, jaki adbyŭsia 4 lutaha 2022 hoda, u dzień adkryćcia Zimovych Alimpijskich hulniaŭ 2022 hoda ŭ Piekinie.
Padčas samitu Pucin nie pakazaŭ nijakich prykmiet taho, što jon źbirajecca pačać poŭnamaštabnaje ŭvarvańnie va Ukrainu. Ale heta ŭvarvańnie adbyłosia 24 lutaha ŭ vyniku blickryhu, jaki, jak mierkavała Rasija, budzie dastatkova mahutnym, kab padparadkavać ukrainski ŭrad u Kijevie, stalicy hetaj krainy.
Jak piša vydańnie, niečakany napad pryvioŭ Kitaj u paniku. Na pieramovach 20 dniami raniej Si Czińpin i Pucin zajavili ab partniorstvie pamiž ich krainami «biez abmiežavańniaŭ». Takim čynam, dla ludziej va ŭsim śviecie było całkam naturalna zrabić vysnovu, što Kitaj maŭkliva ŭchvaliŭ poŭnamaštabnaje ŭvarvańnie Rasii.
Ale heta było nie tak. Kitaj niedaacaniŭ sapraŭdnych namieraŭ Rasii, piša Nikkei.
Piekin, jaki, niesumnienna, viedaŭ pra maštab rasijskich vojskaŭ pablizu miažy z Ukrainaj, mierkavaŭ, što hetyja vojski ŭvarvucca tolki va ŭschodniuju častku Ukrainy.
Va ŭsiakim vypadku, administracyja Si Czińpina nie čakała poŭnamaštabnaha ŭvarvańnia, asabliva takoha, jakoje adbudziecca ŭsiaho praz čatyry dni paśla zakryćcia zimovych Alimpijskich hulniaŭ u Piekinie i za tydzień da adkryćcia Zimovych Paralimpijskich hulniaŭ, dadaje vydańnie.