Rarytetny darahi aŭtamabil koštam 610 tysiač rubloŭ sprabavali ŭvieźci ŭ Litvu
Pa ekśpiertyzu źviarnulisia navat u Minkult.
05.01.2024 / 12:02
Rarytetnaje aŭto 1947 hoda vypusku sprabavali vyvieźci ź Biełarusi bieź nieabchodnych dakumientaŭ. Niezakonny vyvaz transpartnaha srodku, jaki źjaŭlajecca kulturnaj kaštoŭnaściu, vyjavili hrodzienskija mytniki ŭ punkcie propusku «Kamienny Łoh», paviedamlaje pres-słužba biełaruskaj mytni.
Na takim lehkavym aŭtamabili marki «ZIS 110» jechaŭ u Litvu hramadzianin Rasii. Vybraŭšy «zialony kalidor», kiroŭca paćvierdziŭ toje, što tavary, jakija padlahajuć abaviazkovamu dekłaravańniu, u jaho adsutničajuć.
Pry praviadzieńni mytnaha kantrolu supracoŭniki mytni źviarnuli ŭvahu na datu vypusku aŭto, ukazanuju ŭ techničnym pašparcie.
Mašyna była vypuščana ŭ 1947 hodzie, a transpartnyja srodki, vyrablenyja da 1 studzienia 1951 hoda, adnosiacca da katehoryi kulturnych kaštoŭnaściej. Tamu ich treba dekłaravać.
Toje, što transpartny srodak adnosicca da katehoryi kulturnych kaštoŭnaściaŭ, paćvierdzili i ŭ Minkulcie
Košt niezadekłaravanaha rarytetnaha aŭto skłaŭ kala 610 tysiač rubloŭ.
U dačynieńni da hramadzianina Rasi raspačaty administracyjny praces u adpaviednaści z č. 4 art. 15.5 KaAP (niedekłaravańnie albo pradstaŭleńnie niedakładnych źviestak ab tavarach). Sankcyjaj artykuła praduhledžany štraf da 30% ad koštu niezadekłaravanaha tavaru.