Cichanoŭskaja ŭ Varšavie sustrełasia z prezidentam Polščy i kiraŭnictvam polskaha parłamienta
Śviatłana Cichanoŭskaja padčas svajoj pracoŭnaj pajezdki ŭ Varšavu 9 studzienia praviała sustrečy z polskim kiraŭnictvam. Pry hetym, što važna, jana sustrełasia i z prezidentam Polščy Andžejem Dudam, i z kiraŭnictvam polskaha parłamienta, jakija ciapier pamiž saboj u kanflikcie.
09.01.2024 / 23:35
Śviatłana Cichanoŭskaja i Andžej Duda
Ciapier u Polščy isnuje dastatkova vostraje ŭnutranaje supiernictva pamiž prezidentam ad partyi «Zakon i spraviadlivaść» Andžejem Dudaj i pradstaŭnikami kaalicyi, jakaja pieramahła vosieńniu minułaha hoda na parłamienckich vybarach i ciapier kantraluje ŭrad i parłamient. Adnak supiarečnaści, jak vyhladaje, nie tyčacca staŭleńnia da biełaruskaha pytańnia i Śviatłany Cichanoŭskaj jak paŭnamocnaj pradstaŭnicy biełaruskaj hramadzianskaj supolnaści za miažoj.
Andžej Duda paśla sustrečy ź Cichanoŭskaj vykłaŭ u sacsietcy Ch sumiesnaje fota ź joj, napisaŭšy:
«Usiudy, dzie ja znachodžusia na mižnarodnym forumie, kali ja kažu pra situacyju ŭ Biełarusi, ja zaŭsiody zhadvaju vas — biełaruskuju supolnaść.
Pryjdzie čas, kali my ŭsie razam budziem atrymlivać asałodu ad svabody i suvierenitetu; my biez strachu piarojdziem polska-biełaruskuju miažu.
Ja zaŭsiody budu padtrymlivać dziejańni tych, chto choča svabodnaj Biełarusi».
U toj ža čas śpikiery polskich Siejma i Sienata Šyman Hałoŭnia i Małhažata Kidava-Błońska padčas sustrečy sa Śviatłanaj Cichanoŭskaj i delehacyjaj Abjadnanaha pierachodnaha kabinieta Biełarusi zapeŭnili biełaruski bok u poŭnaj padtrymcy demakratyčnych siłaŭ Biełarusi. Taksama surazmoŭcy pahadzilisia: patrebna novaja, bolš efiektyŭnaja, stratehija pa Biełarusi dla vyzvaleńnia palitviaźniaŭ i spynieńnia represij.
Śviatłana Cichanoŭskaja i Šyman Hałoŭnia
Polskija palityki pahadzilisia pravieści słuchańni pa Biełarusi ŭ Siejmie i Sienacie — i vynieści rezalucyju. Płanujecca, što dakumient uchvalić padtrymku jeŭrapiejskaha vybaru Biełarusi, nieabchodnaść nieadkładnaha vyzvaleńnia palitźniavolenych i padtrymaje pryciahnieńnie režymu Łukašenki da adkaznaści.
Śviatłana Cichanoŭskaja i Małhažata Kidava-Błońska
Asobna baki abmierkavali stvareńnie biełaruskich škoł u Polščy i pašyreńnie mahčymaściaŭ dla biełaruskamoŭnaj adukacyi dziaciej.
Čytajcie taksama:
Cichanoŭskaja ŭ Varšavie sustrełasia ź ministram Sikorskim